Joven rezisténsia solisita Prezidente Repúblika atu revee prosesu atribui kondekorasaun
DILI, 09 Outubru (TATOLI)—Membru Organizasaun Amizade Resisténsia rekomenda ba Prezidente Repúblika, José Ramos-Horta, atu revee no halo konsultasaun kona-ba prosesu atribui kondekorasaun, liuliu Orden Kolár, hodi asegura katak ema-ne’ebé simu kondekorasaun ne’e merese duni tuir sira-nia kontribuisaun.
João da Silva Choque nu’udár reprezentante Organizasaun Amizade Rezisténsia Timor-Leste, hateten rekomendasaun ne’e bazeia ba diálogu ne’ebé hala’o fulan rua liubá, ho partisipasaun husi organizasaun rezisténsia, Frente Urbana, Grupu Arte Marsiál, Arte Rituál, Sosiedade Sivíl no deputadu sira.
Nia esplika katak diálogu ne’e identifika nesesidade atu avalia filafali prosesu distribuisaun kondekorasaun, tanba iha preokupasaun kona-ba balansu no justisa iha hili ema-ne’ebé merese simu kondekorasaun.
“Tanba ne’e, ami aprezenta rekomendasaun lubuk ida ba Prezidente Repúblika, atubele tetu no halo konsultasaun fali, hodi identifika ho loloos ema sira-ne’ebé merese simu Orden Kolár,” nia dehan iha Palásiu Prezidensiál, Bairru Pite, Sesta ne’e.
Nia haktuir katak Prezidente Repúblika simu rekomendasaun sira-ne’e no prontu atu kontinua halo konsultasaun ho komisaun no reprezentante sira husi rezisténsia antes foti desizaun kona-ba distribuisaun medalla.
Aleinde ne’e mós, Choque rekomenda atu kondekorasaun iha loron nasionál importante sira, hanesan 20 Maiu no 28 Novembru no loron boot nasionál sira seluk, konsidera tuir área servisu no kontribuisaun idaidak nian.
Nia fó ezemplu katak profisionál saúde sira bele simu kondekorasaun iha loron ne’ebé liga ho saúde, atu la mistura kondekorasaun ba profisionál sira ho kondekorasaun ba membru rezisténsia, ne’ebé iha kontribuisaun espesiál iha luta libertasaun nasionál.
João Choque hateten katak rekomendasaun sira-ne’e importante atu evita polémika kona-ba prosesu fó kondekorasaun iha futuru.
Kona-ba jove sira-ne’ebé partisipa iha luta rezisténsia no simu kondekorasaun, nia konsidera katak balu merese simu, maibé prosesu hili ema balun presiza avalia ho kuidadu.
Nia tenik katak iha situasaun balun, proposta ba kondekorasaun bele influénsia husi relasaun pesoál, hanesan amizade, kolega ka membru grupu, ne’ebé bele hamosu preokupasaun kona-ba kritériu hili ema.
Maski nune’e, nia apresia Prezidente Repúblika nia disponibilidade atu rona rekomendasaun no ideia husi membru rezisténsia, hodi hadi’a prosesu kondekorasaun iha futuru.
Revizaun sistema governasaun
Iha parte seluk, bainhira jornalista husu kona-ba posibilidade atu halo revizaun ba Konstituisaun no sistema governasaun, reprezentante Amizade Rezisténsia ne’e defende katak atensaun tenke fó mós ba ema sira-ne’ebé hala’o sistema.
Nia subliña katak sistema governasaun ne’ebé di’ak presiza ema sira-ne’ebé kumpre no hala’o sistema ne’e ho responsabilidade.
“Ita bele halo sistema ne’ebé di’ak, maibé se ema la hala’o tuir sistema ne’e, sistema ne’e sei la funsiona ho di’ak,” nia afirma.
Nia hanoin katak atu asegura governasaun ne’ebé di’ak, importante la’ós de’it atu hadi’a sistema, maibé mós atu asegura katak ema sira-ne’ebé hala’o sistema kumpre regra no prinsípiu ne’ebé vigora.
Jornalista: Osória Marques
Editór: Xisto Freitas da Piedade
