PM Xanana, emprezáriu tailandéz diskute oportunidade investimentu iha Timor-Leste
DÍLI, 9 Outubru 2026 (TATOLI) – Primeiru Ministru Xanana Gusmão hasoru malu ho Emprezáriu Tailandéz, inklui lideransa husi Grupu ThaiBev no Thai Charoen Corporation Group (TCC Group), hodi diskute oportunidade investimentu iha Timor-Leste no kooperasaun ekonómika.
Enkontru ne’e realiza iha Hotel Mandarin Orientál, Bangkok, no partisipa husi CEO Grupu ThaiBev, Thapana Sirivadhanabhakdi; Rezidente Ezekutivu TCC Group no Prezidente Thai Beverage Public Company Ltd, Sopon Racharaka; no Polapatr Suvarnazorn nu’udár Konselleiru.
Durante enkontru, parte rua diskute kona-ba oinsá atu hametin relasaun ekonómika no identifika oportunidade kooperasaun iha área investimentu, produsaun lokál, turizmu, komérsiu retallu, propriedade no lojístika.
PM Xanana hato’o apresiasaun bá oportunidade atu hasoru diretamente lideransa TCC Group no ThaiBev, no rona esperiénsia grupu ne’e iha dezenvolve negósiu iha rejiaun.
“Ha’u kontente atu bele aprende liután kona-bá TCC Group no ThaiBev. Ita-boot nia atividade sira iha rejiaun tomak. Enkuantu TCC Group hala’o operasaun iha Sudeste Aziátiku tomak, ho negósiu sira ne’ebé kobre bebidas, hahán, retallu, propriedade, ospitalidade no seitór sira seluk”, PM Xanana hateten.
Xefe Governu hateten katak, ho Timor-Leste agora sai ona membru ASEAN, Governu atribui prioridade bá hametin ligasaun ekonómika no komersiál ho nasaun no grupu negósiu sira iha rejiaun.
PM Xanana subliña katak prioridade ida Timor-Leste nian maka dezenvolve ekonomia produtiva no diversifikada, liuliu habelar produsaun doméstika no hamenus dependénsia bá sasán importadu.
“Ami iha ekonomia ida ne’ebé nakloke no buras no impostu ne’ebé ki’ik tebes. Investimentu estranjeiru sei iha papél importante iha ami-nia dezenvolvimentu. Ami simu investidór sira ne’ebé sériu, preparadu atu haree bá tempu naruk no servisu hamutuk ho ami atu dezenvolve ami-nia ekonomia”, PM Xanana subliña.
PM Xanana mós realsa katak Timor-Leste buka investimentu ne’ebé bele kria empregu, aumenta produsaun lokál no dezenvolve kadeia fornesimentu doméstika.
“Ami kontente atu rona ita-boot sira nia estratéjia investimentu no saida maka importante bá ita-boot atu deside atu investe. Hanesan mós produsaun bebidas. Ami fiar katak Timor-Leste bele oferese oportunidade bá Grupu TCC iha área turizmu, retallu, propriedade no lojístika”, PM Xanana dehan.
Iha mós oportunidade atu dezenvolve kooperasaun kulturál entre Timor-Leste ho Tailándia, liuhosi área edukasaun, interkámbiu no inisiativa sira ne’ebé bele hametin ligasaun entre povu rua.
Governu Timor-Leste, iha esforsu atu diversifika ekonomia nasionál, hakarak dezenvolve indústria no kadeia produsaun doméstika hodi aumenta kapasidade atu prodúz sasán iha rai-laran no hamenus dependénsia bá importasaun iha tempu naruk.
Iha kontestu ne’e, Governu mós buka atu hametin apoiu finanseiru no asesu bá merkadu bá empreza mikro, ki’ik no médiu (EMKM), inklui liuhosi instituisaun finanseira no banku dezenvolvimentu nasionál.
Apoiu bá empreza lokál sira konsidera importante atu aumenta partisipasaun emprezáriu timoroan sira iha atividade ekonomia, kria empregu no kontribui bá kreximentu sustentável.
Kooperasaun ho TCC Group mós bele loke oportunidade bá Timor-Leste atu aprende hosi esperiénsia grupu ne’e iha área indústria, agro-alimentár, retallu, imobiliáriu no lojístika.
Transferénsia koñesimentu tékniku, formasaun profisionál no fahe prátika operasionál bele kontribui bá dezenvolvimentu kapasidade traballadór timoroan sira, liuliu foin-sa’e sira, no hametin negósiu lokál iha seitór oioin.
Enkontru ne’e mós haree oportunidade atu investe iha dezenvolvimentu foin-sa’e sira liuhosi formasaun, empregu no inisiativa desportu, inklui posibilidade interkámbiu futeból juvenil ho Tailándia.
Inisiativa sira ne’e bele sai meiu atu promove aprendizajen, troka esperiénsia kulturál no dezenvolve talentu foin-sa’e timoroan sira.
PM Xanana afirma katak Timor-Leste nakloke bá investidór sira ne’ebé iha kompromisu bá parseria tempu naruk no dezenvolvimentu sustentável, ho objetivu atu kria benefísiu bá ekonomia no povu Timor-Leste.
Akompaña PM Xanana iha enkontru ne’e Vise-Primeiru-Ministru no Ministru Koordenadór Asuntu Ekonómiku, no Ministru Turizmu no Ambiente, Francisco Kalbuadi Lay; Vise-Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino; no Embaixadór Timor-Leste iha Tailándia, Francisco Cepeda.
Jornalista: Alexandra da Costa
Editór: Filomeno Martins
