Xanana hasoru eis-militár Tailándia, antigu membru misaun manutensaun pás iha Timor-Leste

DÍLI, 09 Outubru 2026 (TATOLI) — Primeiru Ministru Kay Rala Xanana Gusmão ho delegasaun hasoru malu ho eis-militár no eis-ofisiál Forsa Armada Tailándia ne’ebé hola parte iha misaun manutensaun pás Nasaun Unida (ONU), iha Timor-Leste, iha 1999.

Enkontru ne’e realiza iha ámbitu vizita ofisiál PM Xanana bá Tailándia durante semana-ida, no sai oportunidade atu hametin amizade no relasaun istórika entre Timor-Leste ho Tailándia.

Iha enkontru ne’e, Xanana hato’o nia orgullu no agradese ba eis-militár sira ne’ebé servisu iha misaun ONU durante períodu importante iha istória Timor-Leste nian iha 1999, bainhira povu Timoroan presiza tebes apoiu no solidariedade hosi komunidade internasionál.

Xefe Governu husu ba eis-militár sira atu kontinua akompaña no apoia dezenvolvimentu Timor-Leste iha futuru.

Eis-Xefe Forsa Defeza no Prezidente Konsellu Administrasaun Asian Institute of Technology (AIT), Jenerál Dr. Boonsrang Niumpradit, hato’o apresiasaun tanba bele hasoru malu ho PM Xanana no konsidera enkontru ne’e hanesan momentu ida ne’ebé emosionál no rekopera memória amizade hosi tempu misaun iha Timor-Leste.

“Ami kontente tebes atu hasoru malu ho Primeiru-Ministru Xanana Gusmão. Enkontru ne’e emosionál no amizade tebes, katak ami ko’alia ho sentimentu hosi fuan ba fuan. Ida-ne’e ha’u hanoin di’ak no halo ami bele ko’alia ho livre liután,” Jenerál Dr. Boonsrang Niumpradit hateten iha Hotel Mandarin Oriental, Bangkok, Tailándia, Kinta ne’e(08/10).

Enkontru ne’e mós aborda kona-ba dezenvolvimentu Timor-Leste, ne’ebé, maski nu’udar nasaun ki’ik, kontinua hatudu progresu dezenvolvimentu ne’ebé signifikativu.

Jenerál Dr. Boonsrang hateten katak eis-militár no eis-ofisiál sira ne’e nunka haluha Timor-Leste no povu Timoroan, liuliu tanba sira antes hala’o servisu iha nasaun ne’e iha períodu importante ida.

“Ami nunka bele haluha nasaun hanesan Timor ne’ebé ita servisu maka’as no Timoroan sira mós servisu maka’as hodi dezenvolve sira-nia an. Timor-Leste nia progresu dezenvolvimentu avansa maka’as tebes,” nia subliña.

Nia mós konsidera katak, maski Timor-Leste nu’udar nasaun ho populasaun ki’ik, nasaun ne’e iha pozisaun no influénsia importante, liuliu iha rejiaun ASEAN no komunidade internasionál.

Delegasaun eis-militár no eis-ofisiál Tailándia ne’ebé hasoru malu ho PM Xanana kompostu hosi:

• Eis-Xefe Forsa Defeza, Jenerál Dr. Boonsrang Niumpradit;
• Eis-Sekretáriu Permanente Defeza, Jenerál Udomchai “Ood” Bueangbon;
• Eis-Xefe Forsa Defeza, Jenerál Dr. Worapong Sanganet;
• Eis-espesialista iha Kuartél-Jenerál Forsa Armada Tailándia, Jenerál Dutsadi Ramsomphop;
• Eis-espesialista iha Kuartél-Jenerál Forsa Armada Tailándia, Jenerál Dr. Worapong Sanganet;
• Diretór Informasaun Militár ka reprezentante Xefe Forsa Defeza, Tenente-Jenerál Songwit Wayuhuead;
• Antigu funsionáriu Nasaun Unidas iha Timor-Leste, Apinporn Israngkun Na Ayudhya;
• Konsúl Onoráriu Timor-Leste iha Provín sia Prachuap Khiri Khan, Inita Jamikornl;
• Xefe Gabinete Jenerál Dr. Boonsrang Niumpradit, Koronél Araya Chulanont; no
• Ajudante Adjuntu Sekretáriu-Jerál Dr. Boonsrang Niumpradit, Tenente Xefe Dr. Cherdsak Sroisuwan.

Akompaña PM Xanana iha enkontru ne’e Vise-Primeiru-Ministru no Ministru Koordenadór Asuntu Ekonómiku, no Ministru Turizmu no Ambiente, Francisco Kalbuadi Lay; Vise-Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino; Ministru Transporte no Komunikasaun, Miguel Marques Gonçalves Manetelu; Vise-Ministra Negósiu Estranjeiru no Kooperasaun, Jesuína Maria Ferreira Gomes; Vise-Ministra Asuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; Embaixadór Timor-Leste iha Tailándia, Francisco Cepeda; no Xefe Gabinete Primeiru-Ministru, Elizabeth Exposto.

Jornalista: Alexandra da Costa
Editór: Filomeno Martins