Festivál Japaun hametin amizade no interkámbiu kulturál ho Timor-Leste
DILI, 10 Outubru 2026 (TATOLI)–Embaixada Japaun iha Timor-Leste organiza Festivál Japaun 2026, iha Timor Plaza, Dili, Sábadu ne’e. Festivál ne’e ho objetivu atu hametin amizade no promove interkámbiu kulturál entre Japaun no Timor-Leste.
Festivál ne’e aprezenta kultura japoneza ba públiku liuhusi demostrasaun arte marsiál tradisionál, aprezentasaun múzika, no gastronomia.
Atividade ne’e inklui demostrasaun arte marsiál japoneza, hanesan Kempo, Aikido, Karate-Do no Shorinji, nune’e mós aprezentasaun múzika no kultura kontemporánea japoneza, inklui J-pop no anime.
Iha ninia intervensaun, Embaixadór Japaun iha Timor-Leste, Yamamoto Yasushi, hato’o boas-vindas ba partisipante sira hotu no subliña importánsia amizade, respeitu ba kultura no relasaun bilaterál entre nasaun rua.
“Aleinde sai parseiru iha dezenvolvimentu, ami maka belun di’ ak sira-ne’ebé maka konsidera idaidak nia kultura ho respeitu aas,” Embaixadór Yamamoto Yasushi dehan.
Nia mós temi katak Japaun, ne’ebé koñesidu nu’udar “Rai Loro-matan Sa’e”, no Timor-Leste, ne’ebé koñesidu nu’udar “Rai Lorosa’e”, iha ligasaun simbóliku liuhusi referénsia ba loro-matan sa’e.
“Loron-sa’e nia naroman ne’ebé hanesan liga ona nasaun rua ne’e iha istória konfiansa no amizade ne’ebé kle’an,” nia dehan.
Diplomata japonéz ne’e esplika katak festivál ne’e sai oportunidade ba povu timoroan atu koñese no esperiénsia kultura japoneza, inklui arte marsiál Budo, karaoke, múzika no hahán tradisionál.
“Ha’u hein katak ita-boot sei esperiénsia no disfruta buat hotu ne’ebé Japaun oferese, liuhusi ita-nia sentidu lima,” nia afirma.
Iha parte seluk, Sekretáriu Estadu Arte no Kultura, Jorge Soares Cristovão, hato’o apresiasaun ba Governu Japaun, liuhusi Embaixada Japaun iha Timor-Leste, tanba organiza festivál ne’e atu promove no preserva kultura japoneza.
Nia subliña katak atividade kulturál hanesan ne’e importante atu hametin unidade, amizade no kooperasaun entre nasaun rua, no mós atu promove komprensaun kulturál entre povu rua.
“Eventu ne’e ajuda promove identidade kulturál no envolve timoroan atu hametin amizade no unidade kulturál, nune’e mós reforsa relasaun entre governu ho governu no povu ho povu,” Jorge Soares Cristovão afirma.
Jornalista: Nelson de Sousa
Editór: Xisto Freitas da Piedade
