MOP fó oportunidade ikus ba Empreza My Friend atu konkui Ponte Turon molok udan monu-rai
MANUFAHI, 10 Outubru 2026 (TATOLI)–Ministru Obra Públika, Samuel Marçal, fó oportunidade ikus ba Empreza My Friend Unip. Lda atu kontinua no konklui konstrusaun Ponte Turon, iha Aldeia Turon, Suku Babulu, Postu Administrativu Same, Munisípiu Manufahi, molok udan monu-rai.
Samuel Marçal hateten katak se empreza ne’e la hatudu progresu signifikativu iha tempu badak nia laran, Ministériu Obra Públika (MOP) sei konsidera atu termina kontratu no atribui fali projetu ne’e ba empreza seluk.
Ministru hato’o deklarasaun ne’e durante vizita monitorizasaun ba obra Ponte Turon, iha Sábadu ne’e, atu haree diretamente progresu konstrusaun ponte ne’ebé seidauk ramata, maski tuir informasaun kontratu asina ona iha Marsu 2025 liubá.
Nia hateten katak la kontente ho atrazu iha implementasaun projetu ne’e. Maski nune’e, hafoin haree katak iha ona preparasaun ba kontinua servisu iha terrenu, nia deside atu fó oportunidade tan ba empreza ne’e.
“Tuir loloos, ha’u mai atu kansela kontratu konstrusaun Ponte Turon tanba atrazu ne’ebé kle’ur tebes. Maibé, ohin ha’u mai diretamente iha terrenu no haree katak empreza hahú ona preparasaun ba servisu konstrusaun. Tanba ne’e, ha’u sei fó tempu tan ba sira,” Samuel Marçal dehan.
Nia husu ba empreza atu hatudu progresu ne’ebé bele haree no konklui konstrusaun ponte ne’e antes tempu udan hahú, tanba udan boot bele difikulta movimentu transporte no asesu entre Betanu, Ainaru no Munisípiu Manufahi.
“Ha’u husu ba empreza atu konklui Ponte Turon antes tempu udan hahú,” nia enfatiza.
Samuel Marçal esplika katak Governu komprende difikuldade ne’ebé empreza konstrusaun nasionál sira enfrenta, inklui limitasaun kapitál no ekipamentu. Maski nune’e, nia subliña katak empreza sira tenke hatudu kompromisu, responsabilidade no esforsu atu kumpri obrigasaun tuir kontratu ne’ebé sira asina.
Nia mós afirma katak MOP sei foti medida, inklui terminasaun kontratu, hasoru empreza sira-ne’ebé la hatudu kompromisu atu kontinua no ramata projetu tuir obrigasaun kontratuál.
Kontekstu
Antes ne’e, TATOLI relata iha 26 Jullu 2025 katak Ministru Obra Públika, Samuel Marçal, fó ona notifikasaun ba empreza sira-ne’ebé responsável ba projetu Ponte Tutuluru no Turon iha Manufahi tanba laiha progresu signifikativu. Iha notísia ne’e, TATOLI relata katak Empreza lokál My Friend responsavel ba Ponte Tutuluru, enkuantu empreza internasionál Guang Ping International Sarl responsável ba Ponte Turon, ho naruk metru 135 no kustu estimadu Millaun $2,8. Lee notísia anteriór TATOLI kona-ba progresu Ponte Tutuluru no Turon.
Informasaun kona-ba projetu infrastrutura, kontratu no progresu obra públika bele hetan mós liuhosi sítu ofisiál Ministériu Obra Públika (MOP).
Jornalista: Francisco Sony
Editór: Xisto Freitas da Piedade
