MOP sei halo levantamentu tékniku ba konstrusaun ponte iha Serema

MANUFAHI, 11 Outubru 2026 (TATOLI)–Ministériu Obra Públika (MOP) sei hala’o levantamentu tékniku iha Aldeia Serema, Suku Babulu, Munisípiu Manufahi, atu prepara konstrusaun ponte ne’ebé sei fasilita asesu komunidade, liuliu durante tempu udan.

Ministru Obra Públika, Samuel Marçal, hateten katak nia vizita ba fatin ne’e hamutuk ho ekipa téknika MOP atu observa diretamente kondisaun mota no identifika nesesidade konstrusaun ponte nian.

Nia informa katak, iha tempu badak nia laran, MOP sei haruka fali ekipa téknika ba fatin ne’e atu halo levantamentu dadus no prepara dezeñu tékniku molok hahú konstrusaun.

“Agora ita bele aproveita tempu bailoron atu hahú servisu inisiál. Nune’e, bainhira tempu udan mai, ita bele kontinua servisu iha parte leten ponte nian, tanba servisu iha parte kraik ita bele finaliza uluk,” Samuel Marçal dehan iha Serema, Sábadu (10/10).

Nia esplika katak, durante tempu udan, mota ne’e sai obstákulu ba movimentu komunidade nian. Situasaun ne’e afeta asesu ba servisu saúde, edukasaun no merkadu, inklui difikulta komunidade atu lori sira-nia produtu bá fa’an.

Entretantu, Xefe Aldeia Serema, Manuel Corte-Real, hato’o agradese ba MOP nia inisiativa ne’ebé vizita diretamente bá fatin ne’e no husu atu konstrusaun ponte bele realiza hodi fasilita movimentu komunidade nian.

“Ponte ne’e presiza duni atu harii, tanba bainhira udan-boot, ami-nia komunidade labele asesu bá ospitál no merkadu. Tanba ne’e, ponte ne’e importante tebes ba ami,” Manuel Corte-Real subliña.

Nia hateten katak ponte ne’e sei fó benefísiu ba komunidade sira iha suku tolu no aldeia ualu. Aleinde ne’e, nia mós subliña katak dalan ne’e iha importánsia istórika tanba iha ligasaun ho Foho Riak no dalan ne’ebé uza durante períodu rezisténsia ne’ebé Don Boaventura lidera.

Tuir informasaun ne’ebé Xefe Aldeia Serema fó, aldeia ne’e iha família hamutuk 360 no populasaun totál ema na’in-1.578.

Jornalista: Francisco Sony

Editór: Xisto Freitas da Piedade