Ekipa Kontainer Tais konvida Prezidente Repúblika atu partisipa Programa Horta Show
DILI, 12 Outubru 2026 (TATOLI)-Ekipa Kontainer Tais hasoru malu ho Prezidente Repúblika, José Ramos-Horta, hodi hato’o konvite ba Prezidente Repúblika atu partisipa iha Programa Horta Show ne’ebé Kontainer Tais sei realiza iha Institute of Business (IOB), Dili.
Diretór-Ezekutivu no Fundadór Nafex Art & Container Tais, Natalino Fernandes Ximenes, hatete katak enkontru ne’e la’ós ko’alia de’it kona-ba Programa Horta Show, maibé sira mós sei introdús Kontainer Tais nia ezisténsia no inisiativa sira iha dezenvolvimentiu indústria kulturál no kriativa iha Timor-Leste.
“Ita-nia pedidu hetan aprovasaun no Prezidente Repúblika sei bá halo abertura, maibé sei konbina nia ajenda viajen sira bá rai-li’ur. Ohin mós ami aprezenta múzika ida ho títulu Horta Show ne’ebé sei kanta husi Banda Kraken. Prezidente Repúblika apresia tebes ba inisiativa ida-ne’e”, Natalino Fernandes Ximenes relata hafoin enkontru iha Palásiu Prezidensiál.
Nia esplika katak kria múzika espesífika ba Programa Horta Show iha importánsia atu promove no hametin identidade programa ne’e, ne’ebé durante ne’e envolve bainaka espesiál, inklui reprezentante husi baixada sira.
Natalino hatete katak data fiksu atu realiza Horta Show ne’e sei determina iha empu badak, tanda ekia sei halo halo koordenasaun ho Prezidente Repúblika nia ajenda.
“Maibé tema ko’alia kona-ba Programa Horta Show ne’e mak ezisténsia Kontainer Tais no programa sira ne’ebé daudaun ami halo hela ho apoiu balun ne’ebé husi Governu Timor, hanesan Gabinete Apoiu Sosiedade Sivíl, Suku Diversidade ho Kultura (SUDIKU) ne’ebé ami lori palku hale’u suku sira iha Dili laran, espesialmente iha Don Aleixo”, nia dehan.
Nia hatutan katak Kontainer Tais mós envolve iha atividade artistika sira, inklui manifestasaun artístika anuál ne’ebé Sekretaria Estadu Arte no Kultura (SEAK) organiza, no denzenvolve programa sira liuhusi plataforma dijitál Timor Cretive Hub.
“Husi programa ne’e ami mós husu apoiu Prezidente Repúblika. Ami sei aprosima embaixada hothotu iha Timor-Leste atu foti informasaun sira kona-ba fundu, bolsa atu integra iha plataforma ne’e atu ajuda timoroan sira bele asesu, hanesan bele uza ba sira-nia atividade, projetu sira iha industria kulturál kriativu”, nia dehan.
Kontainer Tais mak espasu kriativu no sentru kulturál foun ba joven sira iha Dili, Timor-Leste. Espasu ne’e loke ofisialmente iha Fevereiru 2026 no lokaliza iha Fomentu, besik IOB, Komoro.
Kontainer Tais adota konseitu inovadór liuhusi reutilizasaun kontentór (container), ne’ebé kombina ho tradisaun no identidade kulturál Timor-Leste, ne’ebé aprezenta liuhusi tais, atu kria espasu ba atividade artístika, kulturál ni kriativa.
Jornalista: Arminda Fonseca
Editora: Maria Auxiliadora
