IGEADI,I.P loke estrada foun ba vítima dezastre naturál iha Ila
KOVALIMA, 12 Outubru 2026 (TATOLI) – Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGEADI, I.P.) hahú loke estrada foun ho naruk kilomentru ida ba vítima dezastre naturál iha Aldeia Ila, Suku Belekasak, Postu Administrativu Belekasak, Munisípiu Kovalima.
Estrada foun ne’e loke bazeia ba proposta husi Xefe Suku Belekasak, Leonito Gusmão, atu fasilita mudansa ba komunidade ne’ebé hela iha área risku dezastre naturál.
Auttoridade ne’e dehan, dezastre naturál ho tipu inundasaun grave akontese iha aldeia Ila, husi loron 1 to’o 5 fulan-Juñu. Tanba ne’e, nia aprezenta ona proposta ba IGEADI, I.P. no agora instituisaun ne’e hahú loke estrada foun.
“Dezastre naturál akontese iha aldeia Ila ,iha loron 01 to’o 5 Juñu dezastre naturál ho tipu inundasaun grave ho nune’e ha’u alerta pedidu ba iha ita-nia instituisaun ne’e, hodi proposta ne’e iha ona submete no daudaun ne’e IGEADI,I.P loke ona estrada foun ho kilomentru ida-resin”, Xefe Suku Belekasak,Leonito Gusmão informa ba TATOLI,iha sede suku Belekasak.
Vítima dezastre naturál ne’ebé identifika iha kategoria grave hamutuk ema na’in-17. Maibé, tuir identifikasaun husi Governu no komunidade lokál, família sira iha Aldeia Ila presiza muda ba fatin seguru tanba área ne’e iha risku.
Aleinde estrada, komunidade presiza mós asesu ba bee-moos no eletrisidade. Tanba ne’e, lideransa suku prepara ona proposta atu aprezenta ba bee no saneamentu no Eletrisidade Timor-Leste (EDTL), atu garante nesesidade bázika ba komunidade ne’ebé sei muda.
Maski proposta ne’e prepara ona to’o agora seidauk aprezenta formalmente ba instituisaun relevante tanba lideransa suku sei okupadu ho preparasaun atu komemora loron internasionál kona-ba redusaun risku dezastre.
Tuir planu, lideransa komunitária sei aprezenta proposta ba EDTL no Bee no Saneamentu Timor-Leste (BTL) iha loron 15 Outubru, depois halao komemorasaun loron internasionál kona-ba redusaun risku dezastre.
Jornalista: Celestina Teles
Editór: Florencio Miranda Ximenes
