Vítima dezastre naturál na’in-11 iha Kovalima simu materiál rekuperasaun husi APC
KOVALIMA, 12 Outubru 2026 (TATOLI)– Autoridade Protesaun Sivil (APC) distribui materiál rekuperasaun ba família vítima dezastre naturál na’in-11 iha Munisípiu Kovalima, atu apoia prosesu konstrusaun uma ne’ebé hetan estragu tanba dezastre naturál.
Distribuisaun ne’e lidera husi Prezidente APC, Jesuino dos Reis Carvalho, hamutuk ho Koordenadór Jestaun Risku Dezastre Munisipál, Filomeno Cardoso, iha segunda-feira.
Prezidente APC, Jesuino dos Reis Carvalho, hateten katak família sira ne’ebé simu apoiu kompostu husi família na’in-10 iha Suku Ogues, Postu Administrativu Maucatar, no família ida iha Suku Zulo, Postu Administrativu Zumalai.
“Apoiu materiál rekuperasaun ne’e nu’udar kontinuidade husi asisténsia emerjénsia ne’ebé Governu fó ba komunidade sira hafoin akontese dezastre naturál. Distribuisaun materiál rekuperasaun ne’e hala’o tuir disponibilidade orsamentu no prosesu administrativu. Materiál rekuperasaun balun iha ona iha armazén, Maibé entrega ba vítima sira tenke tuir prosesu ne’ebé eziste,” nia dehan liuhusi nia diskursu molok distribui materiál konstrusaun iha edifísiu APC-SIGLA Kovalima.
Nia dehan katak, prosesu distribuisaun materiál rekuperasaun depende ba prosedimentu administrativu no disponibilidade orsamentu. Maski nune’e, Governu kontinua buka dalan atu asegura katak vítima sira hetan apoiu ne’ebé presiza.
Prezidente APC mós apela ba komunidade sira atu aumenta kuidadu no evita hahalok ne’ebé bele hamosu dezastre, liuliu iha tempu bailoro naruk. Nia fó atensaun ba prátika sunu rai ne’ebé bele hamosu ahi no ameasa seguransa komunidade.
Nia hatutan katak objetivu husi apoiu materiál rekuperasaun ne’e mak ajuda vítima sira harii fali uma ne’ebé estraga, atu bele hela iha fatin ne’ebé seguru no ho dignidade. Tanba ne’e, nia husu ba xefe suku sira atu monitoriza uza materiál ne’ebé Governu distribui no asegura katak vítima sira uza materiál ne’e ba konstrusaun, la’ós atu fa’an.
Materiál rekuperasaun ne’ebé distribui inklui simentu, besi-baja, besi-beton, skop , pregu, balde no materiál seluk ne’ebé presiza ba konstrusaun.
APC planeia kontinua distribuisaun materiál rekuperasaun iha 13 Outubru 2026 ba vítima dezastre naturál sira iha Aldeia Ila, Suku Belekasak, Postu Administrativu Maucatar.
Iha fatin hanesan, Koordenadór Jestaun Risku Dezastre Munisipál, Filomeno Cardoso, hateten katak família na’in-11 ne’ebé simu materiál rekuperasaun ne’e hetan mós apoia ba transporte, hanesan vítima sira seluk ne’ebé simu ona asisténsia.
Iha parte seluk, vítima dezastre naturál, Simão do Rego, hato’o agradese ba Governu tanba apoiu ne’ebé fó ba família sira ne’ebé afetadu.
Nia dehan katak materiál rekuperasaun ne’e importante tebes ba família vítima sira atu bele konstrui fali uma ne’ebé estraga no hetan fatin atu hela.
“Ami sente kontente tanba Governu fó apoiu materiál rekuperasaun ne’e, atu ami bele konstrui fali ami-nia uma ne’ebé hetan estragu no iha fatin atu hela,” nia dehan.
Jornalista: Celestina Teles
Editór: Florencio Miranda Ximenes
