Xefe Estadu husu Governu reforsa prevensaun ba fenómena klimátika iha Ázia-Pasífiku
DILI, 12 Outubru 2026 (TATOLI)– Prezidente Repúblika, José Ramos-Horta, husu Governu atu reforsa prevensaun, tanba fenómena klimátika ne’e daudaun afeta rejiaun Ázia-Pasífiku ho grave.
“Husu ba Governu fó atensaun espesiál ba preparasaun Governu nian hodi hasoru impaktu El Niño no mudansa klimátika,” Xefe Estadu hateten hafoin hala’o enkontru ho Xefe Governu Kay Rala Xanana Gusmão iha Palásiu Prezidensiál Nicolau Lobato, Bairru Pite, ohin.
Entretantu, Primeiru-Ministru Kay Rala Xanana Gusmão mós hato’o nia haree kona-ba situasaun inséndiu iha Kalimantan-Indonézia no kualidade ar iha kapitál rejionál sira, ne’ebé hatudu tusan boot El Niño nian ba seguransa klimátika no saúde públiku.
Nia esplika, floresta protejida Timor-Leste nian barak liu iha zona foho, tanba ida-ne’e Governu inklui ona zona protejida sira iha enkuadramentu planeamentu territóriál nasionál.
Zona protejida sira-ne’e iha objetivu atu labele halo uma, labele taa ai no labele halo atividade ne’ebé estraga ambiente, hodi proteje klima, bee no rai iha futuru.
Aleinde ne’e, Primeiru Ministru, Kay Rala Xanana Gusmão, mós informa Prezidente Repúblika, José Ramos Horta, kona-ba audénsia públika ho Parlamentu Nasionál sei hahú Kuarta-feira, ne’e signifika diskusaun Orsamentu Jerál Estadu sei tama faze foun.
“Ha’u informa ba Prezidente Repúblika katak, Kuarta-feira hahú ona audénsia públika ho Parlamentu Nasionál no bainhira audénsia sira ne’e hotu di’ak, mak tama ona ba diskusaun iha Parlamentu Nasionál,” Primeiru Ministru dehan.
Nune’e mós, Xefe Goveru hato’o informasaun kona-ba prosesu lejizlativu no relata ba Prezidente Repúblika kona-ba rezultadu vizita ba Tailándia.
Nia konsidera vizita ne’e susesu, liuliu tanba iha investidór sira-ne’ebé manifesta interese atu mai tulun no hametin empreza lokál sira iha Timor-Leste.
Jornalista : Hortêncio Sanchez
Editór : Cancio Ximenes
