DNTT hahú uniformiza xapa mátrikula ba instituisaun Estadu
DILI, 13 Outubru 2026 (TATOLI)—Dirasaun Nasionál Transporte Terrestre (DNTT) hahú uniformiza xapa matríkula bá instituisaun Estadu tuir dekretu Governu nú. 2/2026 kona-ba “Regulamentu atribuisaun númeru matríkula bá emisaun” muda ba xapa G (Governu).
Diretór Nasionál Transporte Terrestre, Nelson Sequeira, Martins, hateten katak “Uniformizasaun xapa matríkula ne’e implementa de’it bá funsionáriu sira iha instituisaun Estadu, maibé sei la aplika ba Prezidente Repúblika, Primeiru-Ministru, Membru Governu, Prezidente Tribunál, Parlamentu Nasionál, F-FDTL, PNTL no orgaun diplomátiku sira,” Diretór DNTT relata ba Agência Tatoli iha nia kna’ar fatin, Balide, ohin.
Antes dekretu-lei ne’e mosu, nia dehan, instituisaun sira-ne’e halo pedidu mai DNTT atu utiliza xapa matríkula tuir sira-nia naran instituisaun ka la’ós uza xapa jerál ho simbólu G (Governu), no mementu ne’ebá DNTT autoriza sira uza xapa ne’e ho provizoriamente bainhira dekretu-lei seidauk iha.
“Maibé agora ita iha ona dekretu lei nú.80/2022 kona-ba “Regulamentu veíkulu Estadu,” no dekretu Governu nú. 2/2026 kona-ba “Regulamentu atribuisaun númeru matríkula bá emisaun”, nia esplika.
Iha dekretu-lei rua ne’e define ona katak instituisaun ne’ebé bele utiliza xapa ne’e mak Prezidente Repúblika, Primeiru-Ministru, Parlamentu Nasionál, F-FDTL, PNTL, korpu diplomátiku inklui Prezidente Tribunál Rekursu.
Enkuantu restu hanesan funsionáriu sira iha Prezidénsia Repúblika nian uza xapa matríkula kór metan ne’e, KAK, KFP, CNE, Tribunál (juíz) sira fó ona karta notifikasaun durante loron 60 hodi troka xapa ne’e tuir uniformizasaun ba xapa Governu no sira bele uza de’it logo instituisaun ba karreta nia lolon.
Tanba ne’e, nia husu ba instituisaun sira atu koopera no tempu to’o ona atu hadi’a buat sira-ne’e, tanba patrimóniu sira-ne’e sosa ho orsamentu Estadu entaun tenke uza xapa ne’ebé Governu atribui ba.
“Bainhira dekretu ne’e implementa husi parte CNE nia mai halo ona uniformiza ba sira-nia xapa matríkula. Bainhira atu uniformiza fali xapa ne’e kompañia sira-ne’ebé manán konkursu públiku ba hatama viatura Estadu sira tenke selu ho montante $30,” nia informa.
Jornalista : Alexandra da Costa
Editór : Cancio Ximenes
