DNTT prepara dekretu-lei atu regula atividade “ojek online” iha Timor-Leste
DILI, 13 Outubru 2026 (TATOLI)—Dirasaun Nasionál Transporte Terrestre (DNTT) ho ekipa jurídiku prepara hela dekretu-lei atu regula atividade “ojek online” ba karreta no motorizada iha Timor-Leste.
Diretór Nasionál Transporte Terrestre, Nelson Sequeira Martins, hateten informasaun kona-ba operasaun viatura online ne’ebé daudaun ne’e akontese iha Dili ne’e, agora sira prepara hela dekretu-lei no bainhira dekretu-lei ne’e iha ona mak DNTT sei regula sira bazeia ba regulamentu.
“Durante ne’e TRON mak halo hela sira-nia operasaun no públiku mós la kestiona kona-ba sira-nia presu, entaun sira sei haree took ho dekretu-lei ne’e públika mak sei bolu kompañia sira-ne’ebé halo negósiu operasaun online,” Diretór DNTT relata ba Agência Tatoli iha nia kna’ar fatin Balide, ohin.
Dirijente ne’e haktuir katak kompañia TRON dezde tinan kotuk nia mai halo karta pedidu bá DNTT no bá Gabinete Ministru Transporte Komunikasaun nian.
“Ami informa ba sira katak sira bele sumete sira-nia pedidu maibé hein lai dekretu-lei ida kona-ba karreta online sira, ne’ebé daudaun ne’e ita-nia jurídiku sira elabora hela no hein de’it,” nia haktuir.
Nia hatutan, iha tempu badak mak dekretu-lei ne’e prontu no promulga ona iha jornál da repúblika mak sira sei bolu kompañia sira hodi halo lansamentu ba públiku.
“Kona-ba “ojek online” sira hanesan Tula Ha’u no seluk tan bainhira dekretu-lei ne’e sai sira mós sei halo hotu rejistu iha DNTT, hato’o sira-nia númeru traballadór, xapa matríkula, nune’e ita bele halo kontrolu ho di’ak,” nia hateten.
Jornalista : Alexandra da Costa
Editór : Cancio Ximenes
