Governu Japaun entrega kamioneta apoiu emerjénsia lima ba Bombeiru TL
DILI, 13 Outubru 2026 (TATOLI)—Governu Japaun entrega kamioneta apoiu emerjénsia unidade lima ba Autoridade Protesaun Sivíl, espesialmente iha Dirasaun Nasionál Bombeiru.
Serimónia entrega kamioneta (hand over) ne’e simu diretamente husi Primeiru-Ministru, Kay Rala Xanana Gusmão, akompañadu husi Prezidente Autoridade Protesaun Sivíl, Jesuíno dos Reis Matos, Sekretáriu Estadu Komunikasaun Sosiál, Expedito Loro Dias Ximenes no Diretór Nasionál Bombeiru, Paulo Maia.
Primeiru-Ministru, Kay Rala Xanana Gusmão, lori Governu no povu Timor-Leste nia naran hakarak hato’o agradesimentu bá Governu Japaun ne’ebé ajuda asaun solidariedade mai Timor-Lests.
“Husi tinan 1999 to’o 2026, Japaun prova-an nu’udar ida husi ami-nia doadór sira no belun di’ak tebes iha área barak no liuhusi dalan oioin, hanesan JICA sai nu’udar ezemplu ida kona-ba oinsá Japaun ajuda ami atu rezolve problema ne’ebé ami enfrenta iha setór oioin,” Primeiru-Ministru, relata iha Palásiu Governu, ohin.
Aleinde ne’e, Xefe Governu dehan Japaun hanesan nasaun ne’ebé iha kapasidade ba área oioin, tanba ne’e mak sira konsege kontinua fó solidariedade no kooperasaun liuliu iha área edukasaun, informasaun no área seluk tan ba Timor-Leste.
“Apoiu ne’ebé Japaun fó mai ami, inklui fornese ekipamentu ba bombeiru sira, mós hatudu tan sira-nia vontade di’ak no domin ba Governu no povu Timor-Leste,” nia dehan.
Embaixadór Japaun iha Timor-Leste, Yamamoto Yasushi, hato’o nia sentimentu ksolok tebes tanba bele tuir serimónia ohin hodi entrega karreta bombeiru lima neʼebé mai husi Japaun ba Governu Timor-Leste.
“Ha’u hakarak hato’o ha’u-nia apresiasaun sinseru ba Governu Timor-Leste luliu bá APC nia kooperasaun besik no esforsu dedikadu sira iha área protesaun sivíl,” Embaixadór Japaun subliña.
Embaixadór Yamamoto dehan, entrega karreta bombeiru ohin nian hanesan ezemplu ida husi esforsu Japaun nian hodi apoia seguransa no moris di’ak povu Timor- Leste nian.
Nia hein katak ekipamentu no formasaun ne’e sei kontribui hodi hametin kapasidade kombate inséndiu no responde ba emerjénsia Timor-Leste nian no ajuda proteje povu nia moris no rikusoin.
“Ha’u husu ba autoridade relevante sira atu garante manutensaun regulár ba karreta sira-ne’e, atu nune’e bele nafatin iha kondisaun di’ak no serbi povu Timor-Leste ba tinan naruk mai tan,” nia hateten.
Japaun no Timor-Leste dezenvolve amizade bazeia ba respeitu malu no kooperasaun, nune’e nia hein katak karreta bombeiru sira-ne’e sei sai hanesan símbolu ida ba amizade no solidariedade ne’ebé dura entre ita-nia nasaun rua ne’e.
“Kareta bombeiru sira-ne’e bele fó kontribuisaun ne’ebé signifikativu hodi hametin Timor-Leste nia kapasidade kombate inséndiu no hodi garante seguransa no moris-di’ak ba nia povu,” nia dehan.
Jornalista : Alexandra da Costa
Editór : Cancio Ximenes
