Governu sei prezerva tais-transmite koñesimentu soru tais ba jerasaun foun sira
DILI, 13 Outubru 2026 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, hateten Governu sei foku harii ekossistema ida hodi prezerva tais no transmite koñesimentu soru tais ba foinsa’e sira liuliu husi jerasaun ida ba jerasaun seluk.
“UNESCO rekoñese ona tais hanesan patrimóniu kulturál Timor-Leste nian. Rekoñesimentu ida-ne’e la’ós atu simu tais no husik hela de’it, maibé tenke iha esforsu konkretu hodi prezerva no kontinua promove,” Ministru Nelyo hateten iha Palásiu Prezidensiál Nicolau Lobato, Bairru Pite, tersa ne’e.
Governu liuhusi Sekretaria Estadu Arte no Kultura, servisu hamutuk ho parseiru sira hanesan Timor Aid, Fundasaun Alola no rede grupu tesi-na’in tais sira hodi asegura serbisu prezervasaun ne’e la’o.
Etapa primeiru ne’ebé Governu halo mak lori produsaun tais besik liután ba jerasaun joven sira. Hodi ne’e, Timor Aid no Fundasaun Alola fó formasaun ba joven sira atu kontinua halo soru tais.
Nia alerta, se joven sira lakohi uza tais mak interese ba tais ne’e sei menus tebes iha loron aban.
Nia mós hato’o agradesimentu ba Prezidente Repúblika, José Ramos-Horta, tanba lideransa ne’ebé sempre partisipa iha kualker atividade kona-ba tais, no ne’e sai parte importante husi promosaun ba patrimóniu nasionál ida-ne’e.
Nia dehan, nia rasik ho kolega Sekretáriu Estadu sira sempre enkoraja joven sira atu uza produtu tais, maibé,partisipasaun no uza tais seidauk atinje100%.
“Agora, deputadu sira iha Parlamentu Nasionál mós hahú ona uza tais. Ida-ne’e sai maneira ida atu fó ezemplu ba sosiedade tomak, inklui jerasaun hotu-hotu, atu uza tais tanba tais sai hanesan eransa kulturál ida. Uza tais mós sai maneira ida atu promove grupu soru-na’in tais sira, atu sira bele badas no kontinua aumenta produsaun,” nia dehan.
Tinan kotuk, Governu hasai rezolusaun ida ba ministériu hotu-hotu atu uza tais pelumenus semana ida dala ida. Maibé, ida-ne’e seidauk atinje 100% tanba sei iha diskusaun kona-ba presu tais nian ne’ebé presiza tau konsiderasaun mós.
Nune’e, diskusaun importante tuirmai mak hamutuk ho Ministériu Komérsiu no Indústria, Sekretaria Estadu no grupu parseiru sira, oinsá mak bele kria ekosistema ne’ebé di’ak ba rede tais sira.
Iha ekossistema ne’e, Governu sei komesa implementa lei ne’ebé proteje motivu no produsaun tais, atu ema-ne’ebé uza motivu ruma tenke simu responsabilidade ba produsaun ida-ne’e.
Diskusaun kona-ba ida-ne’e sei kontinua hamutuk ho Timor Aid no Fundasaun Alola ho ideia sira ne’ebé di’ak, no MJDAK Nelyo Isaac espera katak husi forum ida-ne’e ema barak bele hato’o ideia hodi kontinua prezerva tais ba futuru.
Jornalista : Hortêncio Sanchez
Editór : Cancio Ximenes
