HNGV fó oportunidade ba aplikante sira hato’o reklamasaun durante loron lima

DILI, 13 Outubru 2026 (TATOLI)—Prosesu rekrutamentu ne’ebé halo husi Hospitál Nasionál Guido Valadares hamutuk Ministériu Saúde no mós Komisaun Funsaun Públiku daudaun ne’e tama ona faze daruak, nune’e fó oportunidade ba aplikante sira atu bele halo reklamasaun  durante loron lima, se la konkorda ho lista publikasaun ne’ebé mak fó sai iha semana kotuk.

“Depois ita halo publikasaun rezultadu faze primeira, kandidatu ne’ebé la konkorda ho rezultadu bele hato’o reklamasaun tuir prazu no prosedimentu ofisiál, ne’ebé ita fó oportunidade sira atu halo reklamasaun. Períodu reklamasaun planeadu  durante loron lima, hahú husi horisehik Segunda-feira to’o Sesta-feira semana ne’e,” Diretór  Servisu Apoiu Diagnóstiku no Terapêutika (HNGV), Vidal Lopes, hateten ba jornalista sira iha HNGV, ohin.

Nia esplika, reklamasaun ne’e hahú tiha segunda ne’e, Komisaun rekrutamentu hateten  reklamante hamutuk 500-resin ne’e hatama ona no depois mak ekipa sei haree ida-idak.

Nia afirma, hanesan inisiu hateten ona katak aplikante kuaze hamutuk 8.084, ho totál admitidu hamutuk 4.647 no la admitidu 3.432. Tanba ne’e, aplikante balun aplika ba vaga rua ne’ebé hanesan, entaun sira-ne’e mak nomor ida admitidu no la admitidu ne’ebé HNGV públika ona. Tuir lei, HNGV fó tempu ba aplikante sira-ne’ebé hakarak halo reklamasaun, karik dokumentu balun ne’ebé mak la loos ne’e sira bele halo reklamasaun, depois mak ekipa haree fila-fali, sira reklama iha parte ida-ne’ebé no haree sira-nia dokumentu no sei fó resposta ba reklamante ida-idak.

“Prosesu rekrutamentu iha Hospitál Nasionál Guido Valadares (HNGV) kontínua ho faze primeira, ne’ebé inklui verifikasaun dokumentu kandidatu sira no publikasaun lista kandidatu admitidu no la admitidu,ne’ebé mak ita públika iha loron 08 semana kotuk ne’e tuir informasaun ne’ebé mak aprezenta mai,” nia informa.

Nia dehan, prosesu rekrutamentu ne’e hetan akompaña husi entidade relevante, inklui HNGV, Ministériu Saúde no Komisaun Funsaun Públika, ho objetivu atu garante seleksaun ne’ebé transparente, justu no bazeia ba kritériu ne’ebé determina ona.

“Depois ita sei fó resposta karik, nia reklama nia dokumentu ne’e mós ita sei konsidera, depois nia reklama mak ekipa haree fali nia dokumentu sira-ne’e laloos mak ita fó resposta katak la admitidu, maibé desizaun final tenke bazeia ba evidénsia dokumentál no kritériu selesaun ne’ebé aplika ba kandidatu hotu,” nia esplika.

Nia relata, depois aplikante sira halo reklamasaun, hotu sei tama ba teste eskrita ne’ebé kontinua sei halo iha Komisaun Funsaun Públika.

“Data fisku iha ona ita sei halo teste eskrita iha loron 26 to’o 30 fulan-Outubru tinan 2026, mais horisehik ekipa haree ba totál admitidu ne’e fahe ba loron lima ne’e la to’o. Entaun, tenke  estende tan loron rua depois de loron matebian entre loron 04 ou 05 Novembru, tanba loron ida komisaun funsaun públika so bele halo teste ba ema 720. Ho númeru totál hanesan ne’e, ita halo kalkulasaun hahú husi 26 to’o 30 la to’o, entaun tama fali ita aumenta loron rua,” nia dehan.

Nia informa, prosesu rekrutamentu tenke garante informasaun ne’ebé klaru, oportunidade hanesan ba kandidatu hotu, tratamentu justu ba reklamasaun no publikasaun rezultadu tuir prosedimentu ofisiál.

“Kandidatu sira husu atu akompaña avizu husi pájina ofisiál HNGV no instituisaun kompetente, liuliu kona-ba prazu reklamasaun, sé-sé mak atu teste iha loron tenke haree iha númeru referénsia. Data teste eskrita la loos mai mak hadau malu, fatin no instrusaun atu partisipa, no kandidatu sira tenke hetan valor tuir kritériu, tanba tuir hetan valor 60 ba leten mak liu. Sé ó iha  valór 59 la konsidera tanba buat hotu kritériu mak manda, la’ós katak  voluntáriu no kontratu ida-ne’e mak atu liu, maibé ida ne’e ita halo konkrusu públiku, ema hotu-hotu aplay ba ida ne’e,” nia informa.

Nia haktuir, tanba ne’e komisaun públiku tenke aplika kritériu hanesan ba kandidatu hotu, dokumenta rezultadu avaliasaun no garante katak desizaun sira bazeia ba regra ne’ebé publika ona.

“Tanba ne’e iha transparénsia, igualdade no responsabilidade mak elementu importante atu asegura konfiansa públiku ba prosesu rekrutamentu, ne’e sei laiha famíliarizmu iha prosesu ida ne’e,” nia dehan.

Jornalista : Felicidade Ximenes

Editór        : Cancio Ximenes