OIT konsulta ho parseiru sira atu define prioridade projetu foun ba protesaun sosiál

DILI, 13 Outubru 2026 (TATOLI) – Organizasaun Internasionál Traballu (OIT) halo konsulta ho instituisaun Governu no parseiru sosiál sira hodi define prioridade ba faze foun projetu ACTION/Portugal, ne’ebé sei hahú iha inísiu tinan 2027, ho objetivu atu hametin sistema protesaun sosiál iha Timor-Leste.

Iha semináriu konsulta públika ne’ebé hala’o iha Timor Plaza, Dili, halibur reprezentante sira husi Governu, organizasaun traballadór no empregadór sira, sosiedade sivíl, akadémiku no parseiru dezenvolvimentu sira.

Diretora OIT ba Indonézia no Timor-Leste, Simrin Singh, hatete liuhusi videokonferénsia katak faze foun husi projetu ne’e tenke bazeia ba prioridade nasionál sira no esperiénsia husi instituisaun timoroan sira.

“Ami la’ós iha ne’e atu aprezenta projetu ida ne’ebé dezenvolve tiha ona no iha ninia dezeñu finál. Ami iha ne’e atu troka ideia no identifika hamutuk prioridade sira ne’ebé tenke sai hanesan foku ba faze foun ne’e”, nia dehan.

Nia subliña katak protesaun sosiál iha ligasaun ho empregu, formasaun profisionál, dezenvolvimentu ekonómiku no emprezariál, no inkluzaun sosiál, hodi defende koordenasaun boot liu entre área sira ne’e hodi hadi’a nesesidade populasaun nian.

Simrin Singh hatutan katak rekomendasaun sira ne’ebé rezulta husi diskusaun sira sei kontribui diretamente ba ezbosu dokumentu foun projetu ACTION/Portugal nian.

Koordenadór atividade sira ba projetu ACTION/Portugal, Nuno Castro, esplika katak inisiativa ne’e finansia husi Ministériu Traballu, Solidariedade no Seguransa Sosiál Portugés no abranje nasaun sira ko’alia lia-portugés neen: Timor-Leste, Angola, Kabuverde, Giné-Bisau, Mosabike, no Saun Tomé no Prínsipe.

Tuir responsável, semináriu ne’e hakarak identifika, hamutuk ho instituisaun timoroan sira, área estratéjika sira intervensaun nian ba tinan sira tuirmai, hodi konsidera ligasaun sira entre protesaun sosial, empregu, formasaun profisionál, no dezenvolvimentu sosioekonómiku.

Koordenadór ne’e hatete katak dokumentu ba projetu foun ne’e tenke aprezenta entre fulan-Novembru nia rohan no inísiu Dezembru tinan ida-ne’e, ho implementasaun ne’ebé marka ona atu hahú iha inísiu tinan 2027.

Faze foun tenke aliña ho Planu Estratéjiku Protesaun Sosiál Timor-Leste nian, ho orizonte to’o 2030, ne’ebé dezenvolve husi instituisaun nasionál sira ho apoiu husi OIT no husi projetu ACTION/Portugal.

Nuno Castro mós esplika katak orsamentu ba faze foun ne’e sei define tuir atividade no prioridade ne’ebé identifika durante prosesu konsulta.

Implementasaun sei iha responsabilidade ILO nian, iha koordenasaun ho Governu Portugés no iha koordenasaun ho esforsu kooperasaun bilaterál Portugál nian iha área protesaun sosiál iha Timor-Leste.

Diretór-Jerál Ministériu Solidariedade Sosiál no Inkluzaun, Florêncio Gonzaga, destaka importánsia atu hametin sistema protesaun sosiál hodi hatán ba nesesidade ema sira ne’ebé iha situasaun vulneravel.

Nia dehan Timor-Leste durante ne’e dezenvolve nia sistema protesaun sosiál no rekoñese apoiu ne’ebé fó husi OIT, liuhusi projetu ACTION/Portugal, hodi hametin implementasaun polítika nasionál sira iha área ne’e.

Projetu ACTION/Portugál mak hanesan inisiativa kooperasaun téknika internasionál ida ne’ebé ho objetivu boot atu hafoun no reforsa sistema protesaun sosiál iha rai dezenvolvimentu sira ne’ebé ko’alia lia-portugés, partikulArmente iha País Afrikanu sira Ko’alia Lia-Portugés Ofisiál (PALOP) no Timor-Leste.

Projetu ne’e finansia hUsi Governu Portugál nian, liuhusi Ministériu Traballu, Solidariedade no Seguransa Sosiál no implementa husi OIT, hamutuk ho nia Sentru Internasionál ba Formasaun (CIF-OIT).

Jornalista: Arminda Fonseca

Editora: Maria Auxiliadora