SEPS husu komunidade konstrui uma iha fatin seguru hodi prevene dezastre naturál
KOVALIMA, 13 Outubru 2026 (TATOLI) – Sekretáriu Estadu Protesaun Sivil (SEPS), Domingos Mariano Reis, husu ba komunidade sira atu evita konstrui uma iha fatin risku ba dezastre naturál, hanesan área ho risku erozaun, besik mota, tasi-ninin no fatin sira ne’ebé ba rai-halai.
“Uma seguru signifika katak sidadaun sira labele konstrui uma iha fatin ne’ebé iha risku ba dezastre naturál, hanesan área erozaun, besik mota, tasi-ninin no fatin sira ne’ebé iha perigu. Ida-ne’e importante atu asegura família no komunidade sira,” nia Sekretáriu Estadu Protesaun Sivil (SEPS), Domingos Mariano Reis, iha nia diskursu, durante komemorasaun Loron Internasionál ba Redusaun Risku Dezastre Naturál, ne’ebé hala’o iha Aldeia Ila, Suku Belekasak, Postu Administrativu Maucatar, Munisípiu Kovalima, tersa-feira (13/10).
Nia hatutan katak komemorasaun loron internasionál ne’e sai hanesan meiu ida atu hasa’e konsiénsia públika kona-ba importánsia prevensaun no redusaun risku dezastre naturál.
Ministériu Interior, liuhusi SEPS, kontinua promove atividade sira atu hasa’e koñesimentu komunidade no estudante sira kona-ba oinsá atu identifika perigu, prevene risku no hatene medida ne’ebé tenke foti molok, durante no depois dezastre naturál.
Komemorasaun ne’e hala’o ho atividade oioin, inklui simulasaun kona-ba perigu rai-halai, kompetisaun poezía ba estudante sira hosi eskola EBC, no kompetisaun dada tali ba komunidade sira.
Iha kompetisaun poezía no juri sira hosi Autoridade Protesaun Sivil (APC), Ministériu Administrasaun Estatál (MAE) no CARE hala’o avaliasaun ba estudante sira nia aprezentasaun, ne’ebé foka ba mensajen kona-ba prevensaun no redusaun risku dezastre naturál.
Iha fatin hanesan, Reprezentante Prezidente Autoridade Munisipál Kovalima, Filomeno Cardoso, hato’o katak komemorasaun ne’e importante atu hametin kooperasaun entre Governu no komunidade hodi responde ba preokupasaun sira kona-ba dezastre naturál.
Nia enfatiza katak redusaun risku dezastre naturál la’ós responsabilidade ema ida nian de’it, maibé responsabilidade hamutuk ne’ebé presiza partisipasaun hosi parte hotu hodi halo prevensaun ba dezastre naturál
Jornalista: Celestina Teles
Editór: Florencio Miranda Ximenes
