UNTL-SuperMap asina MoU atu dezenvolve teknolojia Jeoespasiál

DILI, 13 Outubru 2026 (TATOLI)—Universidade Nasionál Timor Lorosa’e (UNTL) no SuperMap Software Co., Ltd., kompañia teknolojia husi Xina, asina Memorandu Entendimentu (MoU-sigla ingleza) atu hametin kooperasaun iha área teknolojia Jeoespasiál, edukasaun no peskiza aplikada.

Reitór UNTL, Joviano António da Costa, hateten katak universidade iha responsabilidade atu prepara rekursu umanu ne’ebé kompetente no kualifikadu hodi kontribui ba dezenvolvimentu sosiál, ekonómiku no teknolójiku iha Timor-Leste.

Nia esplika katak teknolojia Jeoespasiál iha importánsia boot tanba bele aplika iha jestaun rai, planeamentu, agrikultura, protesaun ambientál no jestaun dezastre.

Tuir reitór, kooperasaun ne’e sei liga koñesimentu akadémiku ho pratika, promove inovasaun no hasa’e kapasidade estudante no dosente sira atu responde ba nesesidade nasaun nian.

“Kooperasaun entre UNTL, liuliu FECT, ho SuperMap Software Co., Ltd. bele liga koñesimentu akadémiku ho pratika, promove inovasaun no hasa’e kapasidade estudante no dosente sira atu responde ba nesesidade nasaun nian,” Joviano António da Costa dehan, tuir nota UNTL ne’ebé TATOLI simu iha Tersa ne’e.

Entretantu, Jerente Jerál SuperMap International, Evelyn Sun, hateten katak Timor-Leste iha poténsia boot atu dezenvolve no utiliza Sistema Informasaun Jeográfika (Geographic Information System – GIS) no teknolojia Jeoespasiál iha área oioin.

“Ami agora iha prosesu atu estabelese eskritóriu lokál ida iha Timor-Leste. Ami kontente tebes atu koopera ho UNTL, nu’udár universidade prinsipál ida iha nasaun ne’e. Ami planeia atu oferese formasaun hodi hasa’e koñesimentu no kapasidade estudante no dosente sira iha utilizasaun teknolojia Jeoespasiál. Tanba ne’e, SuperMap kompromete atu apoia universidade hodi harii no dezenvolve kapasidade iha área GIS,” Evelyn Sun dehan.

Teknolojia GIS permite utilizadór sira atu halibur, rai, analiza no aprezenta dadus jeográfiku iha forma mapa no vizualizasaun Jeoespasiál. Teknolojia ne’e bele uza atu apoia planeamentu no prosesu foti desizaun iha setór públiku no privadu.

Informasaun kona-ba teknolojia ne’e bele asesu liuhusi pájina ofisiál SuperMap: SuperMap GIS – Teknolojia no solusaun jeográfika.

Asinatura MoU ne’e partisipa husi Pro-Reitór ba Asuntu Kooperasaun, Profesór Cristóvão dos Reis, Dekanu Fakultade Siénsia no Teknolojia (FECT), Profesór Adalfredo G. da Silva Ximenes, Vise-Dekanu ba Asuntu Kooperasaun no Peskiza FECT, Profesór Leandro Madeira Branco, Enjeñeiru Tékniku SuperMap, Raka Admiral Abdurrahman, no Jerente Tékniku SuperMap Indonézia, Teuku Muhammad Mifdhal Ridho.

Kooperasaun ne’e espera bele loke oportunidade ba estudante no dosente UNTL atu hetan asesu ba formasaun no koñesimentu tékniku iha área GIS, no hametin ligasaun entre universidade no setór teknolojia.

Jornalista: Osória Marques

Editór: Xisto Freitas da Piedade