Vikeke prepara atleta na’in-82 atu partisipa iha FND 2026
VIKEKE, 13 Outubru 2026 (TATOLI)—Munisípiu Vikeke prepara atleta na’in-82 atu reprezenta munisípiu ne’e iha Festivál Nasionál Desportu (FND) 2026, ne’ebé sei realiza iha Dili iha fulan-Novembru. Preparasaun ne’e envolve mós ofisiál no treinadór na’in-40 no delegasaun munisipál na’in-lima (5).
Prezidente Delegasaun FND Munisípiu Vikeke, Carlos Pinto, hateten katak preparasaun ba atleta sira la’o hela atu asegura sira bele partisipa no kompete ho atleta husi munisípiu seluk.
“Agora daudaun ami prepara ona atleta sira atu reprezenta Munisípiu Vikeke iha FND 2026 no kompete ho munisípiu sira seluk,” Carlos Pinto hateten ba TATOLI iha Postu Administrativu Vikeke Vila, Tersa ne’e.
Nia esplika katak Vikeke sei haree filafali modalidade sira-ne’ebé bele partisipa, bazeia ba orsamentu ne’ebé aloka ba munisípiu ne’e. Nia hateten katak orsamentu ne’ebé disponivel ba preparasaun no partisipasaun Vikeke iha FND mak US$10.000.
“Orsamentu ne’ebé aloka ba Vikeke mak US$10.000 de’it. Ami sei haree modalidade sira-ne’ebé bele partisipa, tuir kapasidade finanseira ne’ebé iha,” nia afirma.
Tuir Carlos Pinto, modalidade desportiva ne’ebé Vikeke prepara kompostu husi ekipa futeból mane no feto, voliból mane no feto, atletizmu, badminton, ténis meza, xadrez, desportu tradisionál kalik, basketeból, futsál, taekwondo, desportu paralímpiku ba ema ho defisiénsia no karaté.
Nia hatutan katak atleta sira sei hahú intensifika treinamentu iha loron 19 Outubru 2026, tuir modalidade idaidak, atu hadi’a preparasaun molok kompetisaun nasionál.
Carlos Pinto mós subliña katak FND sai oportunidade importante ba joven sira iha Vikeke atu hatudu sira-nia kapasidade no talentu desportivu iha nivel nasionál.
“Ha’u sente katak eventu ne’e oportunidade di’ak ba joven sira iha Vikeke atu hatudu sira-nia talentu desportivu no reprezenta ho orgullu sira-nia munisípiu,” nia dehan.
Tuir planu delegasaun, atleta, treinadór no ofisiál sira husi Vikeke sei dezloka ba Dili iha loron 11 Novembru 2026 atu partisipa iha abertura FND, ne’ebé sei realiza iha loron 12 Novembru.
Kontekstu
Ministériu Juventude, Desportu, Arte no Kultura (MJDAK), hamutuk ho Prezidente Autoridade Munisípiu Dili, Konfederasaun Desportiva Timor-Leste no Komité Paralímpiku Timor-Leste, realiza ona enkontru koordenasaun iha loron 6 Outubru 2026 atu prepara realizasaun FND no Festivál Nasionál Desportu Paralímpiku iha Dili.
Ministru Juventude, Desportu, Arte no Kultura, Nelyo Isaac Sarmento, hateten katak festivál rua ne’e la’ós de’it kompetisaun desportiva, maibé mós oportunidade atu deskobre talentu foun no promove inkluzaun liuhusi desportu.
Lee notísia relevante: MJDAK halo koordenasaun ho entidade relevante ba realizasaun Festivál Nasionál Desportu.
Aleinde ne’e, iha fulan-Juñu 2026, Federasaun Voleiból Timor-Leste (FVTL) hahú Liga Voleiból Divizaun Datoluk iha Vikeke atu identifika no dezenvolve atleta ho potensialidade iha munisípiu ne’e.
Lee mós: FVTL hahú realiza Liga Voleiból Divizaun Datoluk iha Vikeke.
Jornalista: Vitorino Lopes da Costa
Editór: Xisto Freitas da Piedade
