Xefe Governu lima husi Illa Pasífiku sei partisipa komemorasaun 28 Novembru
DILI, 13 Outubru 2026 (TATOLI)–Vise-Ministru Administrasaun Estatál, Jacinto Rigoberto, hateten Prezidente Repúblika, José Ramos-Horta, konvoka reuniaun nivel aas ida hodi diskute preparasaun ba vizita Xefe Governu sira husi Illa Pasífiku, ne’ebé sei partisipa iha komemorasaun 28 Novembru ba da-51.
“Prezidente Repúblika konvoka reuniaun nivel aas ida, hodi ko’alia kona-ba substánsia, preparasaun vizita Xefe Governu sira husi Illa Pasífiku sei partisipa ita-nia komemorasaun 28 Novembru,” Vise-Ministru hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru-Pité, Dili, Tersa ne’e.
Iha enkontru ne’e, nia esplika, membru Governu no Xefe Estadu-Maior lubuk ida husi Illa Pasífiku marka prezensa, hodi rona orientasaun husi Prezidente Repúblika kona-ba substánsia preparasaun, nune’e ekipa tékniku sira sei fila hodi halo fila-fali preparasaun.
Rigoberto hatutan, normalmente kada tinan, Ministériu Administrasaun Estatál (MAE) mak sempre organiza komemorasaun 28 Novembru. Entaun, komisaun organizadora instala ona servisu balu, nune’e mak mai hasoru Prezidente Repúblika hodi simu orientasaun.
Iha komemorasaun ne’e, Timor-Leste sei hetan vizita husi Xefe Governu na’in-lima (5) mak sei mai.
Nia dehan, servisu preparasaun ne’e sei envolve liña ministeriál sira hotu, kompostu husi Ministériu Negósiu Estranjeiru no Kooperasaun (MNEK), Ministériu Defeza (MD) no Ministériu Interior (MI), atu aselera preparativu, tanba tempu besik ona.
Jornalista : Hortêncio Sanchez
Editór : Cancio Ximenes
