DNMG alerta kondisaun ár sei grave liután bá 70%-80% iha Sesta-feira
DILI, 14 Outubru 2026 (TATOLI)—Diresaun Nasionál Meteorolojia no Geofízika (DNMG) alerta ba públiku atu prevene-an tanba iha Sesta-feira (16/10) ne’e indikasaun ba kondisaun ár sei iha mudansa husi nivel moderadu ba extremu (forte) ne’ebé ho intensidade 70% to’o 80%.
Responsavel Previzaun Públiku iha DNMG, Angelina Freitas, informa bazeia ba sira-nia observasaun katak ahi suar ne’ebé akontese daudaun ne’e sei halo grave liután bá kualidade ár iha Timor Leste, tanba daudaun ne’e kalohan naroman hela maibé iha Sesta-feira sei nakukun
“Ahi-suar ka fumasa foun husi Papua Osidentál ne’ebé prevista atu to’o iha Sesta-feira madrugada/dadersan, ne’ebé sei fó impaktu makaas liu ba munisípiu sira hanesan Lautein, Baukau no Víkeke tanba sira-nia área iha parte leste. Maibé, iha posibilidade anin sei kontinua avansa ba rai-klaran hodi provoka kualidade ár sai pior liután iha territóriu nasionál,” Responsavel Previzaun Públiku iha DNMG, Angelina Freitas, relata ba Agência Tatoli liuhusi telefónika, ohin.
Tuir nia, DMNG nia análiza poluisaun sei grava liu iha Sesta-feira lorokraik ba inísiu kalan, iha ne’ebe sei kauza kualidade ár sai pior liután kompara ho loron hira liu ba iha territóriu Timor laran tomak.
“Signifika ahi suar sei makaas liután, masle la fó impaktu makaas ba inséndiu tanba ita laiha ai-laran tuan (hutan), maibé sei fó impaktu ba saúde públiku hanesan moras vias respiratória, mear, halo iritasaun matan (matan mean) no isin manas,” nia esplika.
Nia hatutan, kondisaun ida-ne’e sei estende to’o Sábadu (17 Outobru 2026) loron tomak no posibilidade sei mellora fali iha Domingu (18 Outubru) lorokraik
Tanba ne’e, nia rekomenda ba públiku atu kontinua kuidadu nafatin ida-idak nia saúde, tenke atensaun ba inan isin-rua, labarik, idozu sira, prevene halo movimentasaun iha li’ur ka hakmatek iha uma laran.
Nia husu atu komunidade uza máskara, taka odamatan no janela bainhira ahi-suar barak,
no buka asisténsia médika bainhira sente mosu sintoma sira hanesan temi tiha ona.
Jornalista : Alexandra da Costa
Editór : Cancio Ximenes
