Infraestrutura klase paralela EBC Raifun iha Utedai la seguru
BOBONARU, 15 Outubru 2026 (TATOLI)-Komunidade no dirijente eskola husu ba Ministériu Edukasaun (ME) atu tau prioridade ba konstrusaun foun eskola klase paralela husi Ensinu Báziku Sentrál (EBC, sigla portugés) Raifun, iha Utedai, suku Ritabou, postu administrativu Maliana, munisípiu Bobonaru, tanba kondisaun infraestrutura la seguru no eskola ne’e mós la’os harii iha rai Estadu.
Profesór Eskola Paralela EBC Raifun iha Utedai, Aleixo Amaral Marques, konfirma problema ne’e difikulta tebes ba ensinu no aprendizajen no risku ba vida estudante sira-nia, liuliu iha tempu udan no bailoro.
“Ai sira komesa lahuk, tempu udan ita ta’uk anin-boot mai de repenti bele estraga uma, bele hanehan tan estudante sira iha eskola ida-ne’e”, nia dehan ohin.
Aleinde ne’e, nia realsa katak estatu rai ne’e mós rai privadu komunidade nia. “Agora, ministeriu haree tiha ona rai iha kraik ne’ebá, komunidade sira entrega tiha ona, hein de’it prosesu atu halo konstrusaun iha rai nia laran”, nia dehan.
Manorin ne’e salienta katak dadaun ne’e eskola paralela referidade akumula de’it estudante na’in-15 husi primeiru to’o kuartu anu, ne’ebé akompaña husi perofesór na’in-tolu.
“Tuir matríkula tinan 2023, estudante na’in-50 maibé tanba momentu ne’ebá profesór na’in-ida de’it, entaun inan-aman sira haruka oan sira ba hotu sentru Raifun. Ne’e mak estudante iha ne’e menus, se momentu ne’e mak profesór kompletu hanesan agora, entaun inan-aman sira la haruka sira nia-oan bá sentru, tanba Utedai ho sentru ne’e distánsia dook tebes”, nia dehan.
Inan-Aman alunu, Maria Imaculada Afonso Pereira, husu ba Ministeriu Edukasaun atu konsidera problema ne’e no tau prioridade iha orsamentu tinan 2027, tanba komunidade oferese voluntariamente rai atu harii eskola foun no profesór natoon ona atu hanorin estudante sira.
“Ami presiza eskola foun, tanba labarik balun la’o husi ne’e bá eskola iha Raifun ne’e dook la halimar”, nia selienta.
Eskola referida harii iha tinan 2023 hodi habelar asesu ba edukasaun no hamenus distánsia ba labarik sira ne’ebé hela dook husi eskola sentrál.
Klase paralela baibain harii iha knua ka suku sira ne’ebé labarik ki’ik sira labele la’o ain dook bá eskola boot.
Jornalista: Sergio da Cruz
Editora: Maria Auxiliadora
