MPIE entrega salaun rezidensiál foun ba sarani iha Nahareka
DILI, 14 Outubru 2026 (TATOLI)—Ministru Planeamentu no Investimentu Estratéjiku (MPIE), Gastão Francisco de Sousa, ofisialmente entrega salaun Residensiál Estasaun Misionária Nossa Señora Imaculada Coração de Maria ba Sarani sira iha suku Nahareka, postu administrativa Ossu, munisípiu Víkeke, hafoin konklui ona projetu konstrusaun ida-ne’e.
Serimónia entrega ne’e akompaña direta husi Bispu Dioseze Baucau, Dom Leandro Maria Alves, ne’ebé fó mós bensaun ba edifísiu foun ne’e no prezide sakramentu krisma ba krismandu sira iha suku Nahareka.
Ministru Planeamentu Investimentu no Estratéjiku, Gastão Francisco de Sousa, hateten Governu komprometidu atu apoiu komunidade liuhusi infraestrutura ne’ebé fó benefísiu direta ba povu, liuliu ba fatin ne’ebé hodi halibur malu, formasaun ba atividade espirituál no sosiál
“Hanesan ohin iha omília Amu Bispu nian katak salaun ne’ebé entrega husi Governu ne’e labele sai de’it edifísiu mamuk ida, maibé sai nu’udar fatin halibur malu nian ne’ebé espresa unidade, diálogu no haksolok,” Ministru Planeamentu Investimentu no Estratéjiku, Gastão Francisco de Sousa, hateten ba sarani sira iha Nahareka, tersa ne’e.
Governante ne’e fó hanoin mós ba krismandu foun sira katak, simu espíritu santu lori responsabilidade nu’udar ema-ne’ebé adultu iha fiar no kontinua sai sasin fiar nian liuhusi hahalok domin, haraik-an, fó liman ba malu, perdua malu, no hasees-an husi hahalok violénsia nian, hodi bele moris iha páz no lori dezenvolvimentu ba rai ida-ne’e.
“Bispu mós sita ensíklika foun husi Papa Leão XIV, _Magnifica Humanitas_, hodi dehan katak “naran seluk husi pás mak dezenvolvimentu,” nia dehan.
Iha biban ne’e mós Padre Residensiál Nahareka, João Paulo, hato’o agradese boot ba Governu liuhusi MPIE no Dioseze Baukau, ne’ebé fó ona apoiu boot to’o obra ne’e konklui ho susesu.
“Ami sarani Nahareka nafatin iha esperansa, esperansa ne’ebé hakerek ho fiar, esperansa ne’ebé fanun iha orasaun hamutuk ho Ami mahein Nossa Senhora do Imaculado Coração de Maria,” Amu-lulik ne’e subliña.
Na’in-lulik ne’e mós dehan sira fiar katak ho esperansa katak uma Maromak nian mós sei sai furak liután. Ohin mehi ne’e sai realidade, maibé realidade foun ida ne’e lori mós responsabilidade boot ba ita hotu atu tau matan no kuida.
Konstrusaun ba salaun rezidensiál foun ne’e hetan tulun husi IX-Governu, liuhusi Gabinete Ministru Planeamentu no Investimentu Estratéjiku ho orsamentu hamutuk $204,116.78, ne’ebé konstrui husi kompañia Rerebain Unipessoal Lda ho durasaun tempu fulan-neen.
Enkuantu serimónia ne’e partisipa mós husi reprezentante husi Ajénsia Nasionál Dezenvolvimentu (ADN), Diresaun Infrastrutura no Irrigasaun, Autoridade Nasionál Petróleu (ANP), Autoridade Munisípiu, Autoridade Postu no Suku, Komandante PNTL Esquadra Ossu no komunidade sira husi Suku Nahareka.
Jornalista : Alexandra da Costa
Editór : Cancio Ximenes
