Pozisaun Arkidioseze Dili ba harii estádiu nasionál iha Tasi-Tolu
DILI, 14 Outubru 2026 (TATOLI) – Arkidioseze Dili la iha objesaun ba esforsu dezenvolvimentu ne’ebé Estadu no Governu Timor-Leste hala’o ba interrese no benefísiu nasaun nian, inklui planu konstrusaun Estádiu Nasionál iha Tasi-Tolu, Bairru Ex-Pameran, Aldeia 12 Outubru, ne’ebé pertense ba Estadu.
Vigáriu Jerál Arkidioseze Dili, Pe. Graciano dos Santos Barros, afirma katak Igreja Katólika, liuhusi Arkidioseze Dili la iha rejeisaun ba planu Governu nian atu harii estádiu iha área ne’ebé identifika nu’udar rai Estadu.
“Ba dezenvolvimentu ita-nia rai, Arkidioseze Dili la iha rejeisaun. Ita apoiu totalmente. Amu Kardinál Dom Virgílio do Carmo da Silva no estrutura episkopál mós la iha rejeisaun ba asuntu ida-ne’e. Tanba ne’e, la iha problema,” Pe. Graciano hateten ba jornalista TATOLI, iha nia fatin servisu, Lecidere, Dili iha Kuarta ne’e.
Autoridade relijioza ne’e esplika katak parte Igreja nian ne’ebé iha área ne’e inklui uma tradisionál no altar Papa João Paulo II nian, nune’e mós altar Papa Francisco nian. Tuir nia, altar rua ne’e iha espasu ne’ebé uza ba atividade espirituál no lokalizadu dook uitoan husi área ne’ebé Governu planeia atu harii estádiu.
“Altar rua ne’e iha espasu ba atividade espirituál no dook uitoan husi planu Governu nian. Tanba ne’e, Arkidioseze Dili apoia totalmente Governu atu harii Estadiun Nasionál iha fatin ne’ebé identifika nu’udar rai Estadu. La iha problema, tanba Arkidioseze apoia dezenvolvimentu ita-nia rai,” nia afirma.
Pe. Graciano mós reforsa katak Arkidioseze Dili kontinua apoia inisiativa dezenvolvimentu ne’ebé lori benefísiu ba povu no nasaun, no espera katak prosesu konstrusaun ne’e bele la’o ho di’ak, ho konsiderasaun ba parte hotu ne’ebé envolve.
Antes ne’e, komunidade sira ne’ebé hela iha Aldeia 12 Outubru, Tasi-Tolu, hala’o ona diálogu ho Governu, liuhusi Sekretaria Estadu Terras no Propriedade (SETP), hamutuk ho Federasaun Futeból Timor-Leste (FFTL) no Ministériu Obras Públikas (MOP), kona-ba preparasaun ba área ne’ebé destina ba konstrusaun estadiun.
Komunidade sira aseita ona atu husik área ne’e ba projetu dezenvolvimentu ne’e, enkuantu Governu mós konkorda atu fó indemnizasaun ba uma-kain na’in 400 resin ne’ebé sei afetadu husi projetu referidu
Tuir informasaun ne’ebé disponivel, prosesu verifikasaun dadus uma-kain sira ne’ebé sei simu indemnizasaun la’o hela.
Komunidade no parte relevante sira hein katak Governu bele kontinua prosesu verifikasaun no indemnizasaun ho transparente no tuir prosedimentu, atu nune’e konstrusaun Estadiun Nasionál bele realiza ho di’ak no komunidade sira ne’ebé afetadu hetan solusaun ne’ebé justu.
Jornalista: Camilio de Sousa
Editór: Rafael A. Ximenes Belo
