SEFOPE realiza formasaun kona-ba kriasaun negósiu foun iha Kovalima
KOVALIMA, 14 Outubru 2026 (TATOLI) – Sekretariadu Estadu Formasaun Profisionál no Empregu (SEFOPE), liuhusi Diresaun Nasionál Empregu Estranjeiru (DNEE), fasilita formasaun kona-ba kriasaun negósiu ba traballadór retornadu no sira-nia família iha Munisípiu Kovalima, atu hametin kapasidade empreendedorizmu, asesu ba kréditu no kriasaun oportunidade empregu.
Reprezentante Prezidente Autoridade Munisípiu Kovalima, Caetano dos Santos Ribeiro dehan katak formasaun ne’e fó oportunidade ba traballadór retornadu sira atu dezenvolve koñesimentu no aplika esperiénsia ne’ebé sira hetan durante servisu iha rai li’ur.
“Traballadór Timoroan balun ne’ebé servisu iha área agrikultura foka ba kultivu ai-fuan, balun iha área oin seluk. Formasaun ne’e atu aumenta sira-nia koñesimentu, hodi bainhira fila mai bele implementa no kria kampu traballu ba maluk sira seluk,” nia dehan bainhira taka atividade ne’e iha salaun ESGP, Suai.
Iha fatin hanesan, Diretór SEFOPE Munisípiu Kovalima, Estafanus Segundo Manek, esplika katak formasaun ne’e orienta ba traballadór retornadu oinsá atu hahú negósiu, dezenvolve atividade ekonomika no asesu ba fasilidade kréditu.
SEFOPE hakarak rona mós esperiénsia traballadór sira durante servisu iha rai li’ur, inklui atividade investimentu ne’ebé sira hahú ka planeia atu hala’o bainhira fila ba mai.
“Ami konvida sira atu mai hato’o sira-nia esperiénsia durante servisu iha rai li’ur no hatene se bainhira fila mai sira halo investimentu ka lae. Programa ida-ne’e importante tebes,” nia afirma.
Bazeia ba dadus SEFOPE traballadór retornadu iha Munisípiu Kovalima hamutuk na’in-90, kompostu husi feto na’in-65 no mane na’in 25.
Tuir rezultadu monitorizasaun SEFOPE, traballadór retornadu balun ne’ebé fila mai hala’o ona atividade ekonómika hanesan kuda modo, haki’ak fahi, loke negósiu mobília no servisu konstrusaun, inklui konstrusaun uma rezidensiál.
SEFOPE sei kontinua buka oportunidade apoiu ba traballadór retornadu sira ne’ebé iha interese atu dezenvolve negósiu, liuliu ba sira ne’ebé hasoru limitasaun kapital atu hahú ka aumenta sira-nia atividade.
Iha formasaun ne’e, SEFOPE konvida mós SERVE atu fahe informasaun kona-ba servisu no prosedimentu rejistu negósiu. Enkuantu Banku Nasionál Komérsiu Timor-Leste (BNCTL) aprezenta informasaun kona-ba prosedimentu asesu ba kréditu SUAVE no tipu kréditu sira, inklui kréditu kapital servisu, investimentu no konsumu. Institutu Apoiu ba Dezenvolvimentu Emprezariál (IADE) mós partisipa iha atividade ne’e.
Entretantu, Traballadór retornadu, Hipolito Fernando Ferreira, apresia programa formasaun ne’e tanba bele ajuda traballadór sira jere rendimentu, transfere osan ba família no buka asesu ba kréditu atu dezenvolve negósiu.
“Formasaun ida-ne’e importante atu fasilita traballadór sira transfere osan ba família no ajuda asesu ba kréditu, hodi kontinua loke kampu traballu ba maluk sira seluk,” nia dehan.
Liuhusi inisiativa ne’e, traballadór retornadu sira iha oportunidade atu aumenta koñesimentu kona-ba jestaun negósiu no asesu ba servisu apoiu relevante, hodi nune’e bele uza sira-nia esperiénsia atu dezenvolve atividade ekonómika no kria oportunidade empregu iha sira-nia komunidade.
Jornalista: Celestina Teles
Editór: Florencio Miranda Ximenes
