Governu apresia inan-feton sira-nia kriatividade transforma produtu lokál ho valór ekonómiku aas
ATAÚRU, 15 Outubru 2026 (TATOLI)–Ministru Komérsiu no Indústria (MKI), Nino Pereira, hamutuk ho Embaixadór Índia mai Timor-Leste, akompaña husi Prezidente Autoridade Ataúru, vizita stand sira iha Feira Aihan, nu’udar parte husi komemorasaun Loron Mundiál ba Aihan, iha Aldeia Usubemasu, Suku Beloi, Postu Administrativu Ataúro Vila, Kuarta ne’e.
Feira aihan ne’e ho tema “Inovasaun Ohin Loron, Nutrisaun Loron Aban”, ne’ebé aprezenta aihan lokál husi Timor-Leste ne’ebé baibain iha Ataúru, inklui produtu ne’ebé transforma husi fehuk no lakeru ba bolus no pudin.
Governu liuhusi Ministru Nino Pereira apresia tebes kriatividade no inovasaun husi inan-feton no joven sira-ne’ebé uza sira-nia liman badaen no badinas hodi transforma produtu lokál ba produtu ho valór ekonómiku aas.
“Apresiasaun ne’e sai motivasaun ba inan no joven sira atu kontinua dezenvolve produtu lokál no hametin ekonomia lokál,” Ministru Nino Pereira hateten bainhira vizita stand (baraka) sira iha feira ba aihan ne’e..
Nia hatutan, inan-feton sira tein hahan mesak kapaas de’it, nune’e tenke fó apresiasaun tanba bele tein hahan tradisionál hanesan ikan tunu, ai-farina sira halo ba dosi no seluk tan.
Tuir nia, buat ne’ebé sira kuda iha rai ida-ne’e, sira dezenvolve atu sai valór ekonomia, entaun Governu tenke motiva sira atu kontinua promove kriatividade sira-ne’e ba loron aban.
Jornalista : Hortêncio Sanchez
Editór : Cancio Ximenes
