Klinika Bairru Pite rejista IRA hamutuk 5.000-resin no Pneumonia 2.800
DILI, 15 Outubru 2026 (TATOLI)—Klinika Bairru Pite, husi Janeiru to’o Outubru, rejista moras Infesaun Vias Repsiratóriu Aguda (IRA hamutuk 5.000-resin no moras Pneumonia ne’ebé afeta ba labarik sira hamutuk 2.800.
“Moras ida barak liu ne’e mak Infesaun Vias Repsiratoriu Aguda, tuir mai mak moras Pneumonia ne’ebé afeta ba labarik sira hamutuk 2.800 no kazu hipertensaun hamutuk 700-resin,” Prezidente Fundasaun Klinika Bairru Pite, Inacio dos Santos, informa ba jornalista sira iha Klinika Bairru Pite, ohin.
Nia afirma, Klinika Bairru Pite mós rejista kazu mánutrisaun hamutuk 1000-resin ne’ebé mak detekta durante Janeiru mai to’o agora husi númeru ne’e iha 742 mak mánurtsaun kazu moderadu no 408 mak ho mánutrisaun grave.
“Bainhira deteta mak mánutrisaun grave ita halo transferésia ba Hospitál Nasionál Guido Valadares hodi halo tratamentu espesialista nian,” nia afirma.
IRA normalmente hahú ho sintoma ne’ebé mosu lalais iha períodu tempu badak.ISPA ne’e bele afeta ba labarik, adultu no ema ferik-katuas, no infesaun ne’e bele hamosu husi virus ka baktéria.
Nia sinál sintoma mak depende ba tipu infesaun no parte sistema respiratóriu ne’ebé afetadu hanesan isin-manas, me’ar, inus-been ka inus-metin, kakorok moras, fani beibeik, ulun moras, isin moras, kolen no fraku, lakon vontade atu han.
“Banhira mosu hanesan ne’e ba lalais fasilidade saúde ne’ebé mak besik hodi hetan tratamentu husi profisionál saúde sira,” nia hateten.
Jornalista : Felicidade Ximenes
Editór : Cancio Ximenes
