Komisaun Edukasaun Sívika atualiza preparasaun servisu ba PM Xanana
DILI, 15 Outobru 2026 (TATOLI)—Komisaun Edukasaun Sívika ne’ebé lidera husi Vise-Ministru Admimistrasaun Estatál, Jacinto Rigoberto de Deus no Ministru Interiór, Francisco da Costa Guterres, hala’o enkontru hodi atualiza sira-nia preparasaun ba planu molok implementa servisu iha terrenu ba Primeiru-Ministru, Kay Rala Xanana Gusmão.
Ministru Interior, Francisco da Costa Guterres, hateten katak ohin sira mai informa servisu preparasaun atu integra servisu komisaun nian ba Primeiru-Ministru
“Iha semana rua nia laran Komisaun bele hahú servisu ona bainhira buat hotu prontu ona, demokrásia, toleransia no uza mekanismu pás hodi rezolve problema,” Ministru Interiór ne’e relata ba jornalista sira iha Palásiu Governu, ohin.
Kuaze tinan rua, nia dehan, sira halo preparasaun hodi aliña ho rezolusaun ne’ebé mak iha. Sira sei halo preparasaun hodi halo lansamentu no sei halo sensibilizasaun ba komunidade iha munisípiu balun ne’ebé sira identifika ona hodi halo intervensaun.
“Servisu ne’ebé ita sei implementa iha terrenu mak iha área edukasaun sívika ne’ebé ligadu ho oinsá atu promove sidadaun sira-ne’ebé ativu no komprometidu ba pás hodi envolve iha dezenvolvimentu ba área desportu, agrikultura, edukasaun, turizmu, juventude,” nia hateten.
Nia mós esplik, servisu ne’e prezide husi Vise-Ministru Administrasaun Estatál kona-ba servisu tékniku iha kraik ka komite ezekutivu sei relata ba komisaun interministerial hodi relata fali ba iha Governu.
“Servisu ne’e envolve mós organizasaun internasionál sira hanesan g7+, UN Woman, enkuantu iha nasionál nian mak liña ministeriál ne’ebé iha ligasaun ba sira-nia planu inklui mós ho órgaun mídia komunikasaun sira,” nia hateten.
Lembra katak iha loron 08 Jullu 2026, Governu aprova ona projetu Rezolusaun Governu ne’ebé aprezenta husi Ministru Interióor, Francisco da Costa Guterres, ne’ebé estabelese Komisaun Edukasaun Sívika ba Pás no Dezenvolvimentu.
Ministru hateten, rezolusaun Governu ida-ne’e aprova konseitu ne’ebé define objetivu, prinsípiu, no estrutura Komisaun nomós determina nia estabelesimentu nu’udar mekanizmu koordenasaun atu dezenvolve estratéjia no koordena asaun sira hodi promove edukasaun sívika iha nivel nasionál, ne’ebé haree liu ba pás no dezenvolvimentu.
Nia esplika, komisaun ne’e kria ho objetivu atu hametin konxiénsia sívika sidadaun sira-nian no promove kultura dame, bazeia ba prinsípiu sira la violénsia, demokrasia, rekonsiliasaun, no partisipasaun ativa iha dezenvolvimentu nasionál.
“Objetivu husi Komisaun ne’e mak atu promove diálogu hanesan dalan atu rezolve diferensa no konflitu sira iha sosiedade, no objetivu seluk mak atu halo diálogu hodi muda ita-nia hanoin no ita-nia hahalok, atu ema hotu komprende katak problema tenke rezolve ho diálogu, la’ós ho konflitu ka violénsia,” Francisco Guterres hateten.
Kona-ba ida-ne’e, nia dehan, sei koordena asaun husi ministériu sira no entidade relevante sira seluk, iha koordenasaun ho autoridade lokál sira, parseiru bilaterál, rejionál, no multilaterál, sosiedade sivíl, no mós komunidade ein jerál.
Konseitu ne’ebé agora aprova ona define mós estrutura funsionamentu Komisaun nian, ne’ebé organiza bazeia ba Komisaun Interministeriál ida, Komité Ezekutivu ida, Sekretariadu ida, no mós programa intervensaun tolu: Edukasaun ba Sidadania, Parseria ba Dame, no Inisiativa Komunitária.
Jornalista : Alexandra da Costa
Editór : Cancio Ximenes
