ME planeia konstrui sentru biblioteka no dezenvolve laboratóriu siénsia iha eskola sira
DILI, 15 Outubru 2026 (TATOLI)—Ministériu Edukasaun (ME) planeia konstrui sentru biblioteka iha eskola ensinu báziku sentrál sira iha Dili, hodi fasilita estudante sira-nia asesu ba livru no hadi’a kualidade aprendizajen. Ministériu ne’e planeia mós dezenvolve laboratóriu ba siénsia no matemátika atu hasa’e koñesimentu no abilidade estudante sira-nian.
Diretór-Jerál Edukasaun Pré-eskolar no Ensinu Báziku Rekorrente ME, Apolinário Serpa Rosa, hateten katak planu konstrusaun sentru biblioteka ne’e sei hala’o liuhusi kooperasaun ho Ministériu Juventude, Desportu, Arte no Kultura (MJDAK).
Apolinário esplika katak dezenvolvimentu laboratóriu siénsia no matemátika ne’e parte ida husi planu Governu atu hasa’e kapasidade estudante sira-nian, inklui prepara sira atu partisipa iha kompetisaun edukasaun ho nasaun sira iha rejiaun ASEAN.
Nia hateten katak, maski Dili no munisípiu balun iha ona biblioteka no laboratóriu, fasilidade hirak-ne’e seidauk adekuada. Kondisaun ne’e inklui biblioteka ne’ebé seidauk kumpre padraun, falta rekursu umanu no ekipamentu, no limitasaun espasu ba atividade prátika.
“Tanba ne’e, Ministériu Edukasaun planeia konstrui sentru biblioteka iha eskola ensinu báziku sentrál sira iha kapitál Dili, hodi estudante sira bele asesu ba livru no materiál aprendizajen ne’ebé seidauk disponivel iha sala aula,” nia subliña.
Aleinde konstrusaun sentru biblioteka, ME sei promove kriasaun mini-biblioteka iha sala aula atu rai livru sira-ne’ebé ministériu fahe ona ba eskola idaidak.
Apolinário hateten katak inisiativa ne’e sei fasilita estudante sira atu lee livru, aumenta koñesimentu no dezenvolve abilidade iha área siénsia oioin.
Nia hatutan katak livru hirak-ne’e hetan apoiu mós husi parseiru Care International atu apoia prosesu aprendizajen iha eskola. Tanba ne’e, nia konsidera katak hadi’a kualidade edukasaun la depende de’it ba biblioteka boot, maibé bele hahú husi mini-biblioteka iha sala aula ne’ebé fasilita estudante sira-nia asesu ba livru.
Kona-ba orsamentu ba konstrusaun sentru biblioteka, Apolinário hateten katak ME seidauk determina montante osan ne’ebé presiza, tanba estudu viabilidade no seidauk prepara dezeñu konstrusaun.
Tanba ne’e, ministériu seidauk bele divulga montante orsamentu ne’ebé sei aloka ba projetu ne’e.
Kontekstu
Antes ne’e, TATOLI relata katak Ensinu Sekundáriu Jerál Fitun Naroman Timor Lorosa’e (FINANTIL) husu ME atu apoia ekipamentu ba laboratóriu siénsia naturál no teknolojia informasaun, tanba falta ekipamentu limita estudante sira-nia oportunidade atu halo atividade prátika.
Jornalista: Osória Marques
Editór: Xisto Freitas da Piedade
