Pasiente sira kontinua sosa ai-moruk iha klinika privada
DILI, 15 Outubru 2026 (TATOLI)—Sentru Saúde Formosa kontinua fó reseita ba pasiente sira atu sosa ai-moruk iha klinika privada sira tanba ai-mrouk balun stock out iha fasilidade saúde referida.
Pasiente Umbelina da Silva hateten, nia moras me’ar, kustupadu no isin-manas durante semana ida ona no ohin mak nian mai konsulta iha Sentru Saúde Formoza, maibe ai-moruk balun laiha no médiku sira kontinua fó reseita hodi ba sosa ai-moruk iha farmasia privada sira.
“Ha’u moras mear, kustupadu, isin manas ulun moras, tuir loloos ha’u simu ai-moruk oin haat maibé sira dehan ai-moruk iha oin tolu de’it mak iha. Maibé ai-moruk oin ida sira haruka ba sosá iha apotik maibé ha’u-nia osan laiha atu sosa,” Umbelina da Silva hateten ba jornalista sira iha Sentru Saúde Formosa, ohin.
Nia esplika, ai-moruk ne’ebé nia atu simu iha oin haat, hanesan Vitamina aumenta raan, Paracetamol 500 mg, Promethazing Hydrochloride no mós Broinhetime syrup.
“Maibé iha ai-moruk oin-oin tolu iha maibé brointhazing Hydrochloride la ne’e sira fó reseita atu ba sosá iha apotik de’it, ne’ebé ha’u osan la iha atu sosa no ha’u ba fali uma de’it ona,” nia hateten.
Iha sorin seluk, família pasiente ne’ebé preokupa iha mídia sosiál katak ai-moruk iha Postu Saúde Hera estoke ai-moruk laiha no profisional saúde sira fó de’it reseita mak sira ba sosá iha apotik sira.
“Liga ho bain loron naruk ho ahi-suar ne’ebé kuaze loron hirak ne’e halo labarik kiik sira hetan moras hotu hanesan mear no isin manas, mai halo konsulta iha postu saúde maibé ai-moruk la iha no sira fó reseita atu ba sosa iha apotik. Ai-moruk hanesan Paracetamol syrup, Amoxilin syrup no mós Bromesin sira-ne’e la iha,” familia pasiente ne’e dehan.
Hafoin ho preokupasaun sira-ne’ebé jornalista tenta atu konfirma ho Diretór Servisu Saúde Munisípiu Dili, maibé nia lakohi fó komentáriu no haruka jornalista sira ba husu iha INFPM.
Jornalista : Felicidade Ximenes
Editór : Cancio Ximenes
