Autoridade Kovalima no APC fó apoiu emerjénsia ba vítima inséndiu iha Debos
KOVALIMA, 16 Outubru 2026 (TATOLI) – Autoridade Munisípiu Kovalima, hamutuk ho Autoridade Protesaun Sivil (APC), fó apoiu emerjénsia ba família Joviana de Fátima José, ne’ebé nia uma hetan inséndiu iha Aldeia Asurai, Suku Debos, Postu Administrativu Suai, Munisípiu Kovalima, iha Kinta kalan.
“Ha’u hetan informasaun kona-ba inséndiu ne’e iha tuku 22:30, kalan. Hafoin simu informasaun nia kontaktu komandante bombeiru atu orienta ekipa bombeiru ba fatin akontesimentu hodi hamate ahi. Ita apoia ona foos kilograma 25, supremie kaixa ida, mina-tein, tua-deho no nesesidade bázika seluk.,” Komandante APC Munisípiu Kovalima, Celestino Afonso Ferreira,
Aleinde ne’e, dadus kona-ba estragu no nesesidade ba rekonstrusaun uma ne’e rekolla ona atu submete ba nivel nasionál hodi hein desizaun kona-ba apoiu rekoperasaun, tanba kazu ne’e tama iha kategoria estragu totál.
Iha fatin hanesan, vítima inséndiu, Joviana de Fátima José, hateten katak nia la hatene kauza inséndiu, tanba momentu ne’e nia hela iha uma nia aman nian. Bainhira fila ba uma, nia haree katak ahi han ona uma tomak, inklui sasan uma-laran no osan US$ 200.
Daudaun, Joviana de Fátima José hamutuk ho nia oan-feto no oan-mane hela temporariamente iha uma nia aman nian, enkuantu hein prosesu konstrusaun fali uma foun.
Jornalista: Celestina Teles
Editór: Florencio Miranda Ximenes
