Dilijente manán prémiu The Best Balibo Five, TATOLI manán Prémiu Greg Shackleton
DILI, 16 Outubru 2026 (TATOLI)—Jornalista husi mídia Dilijente, Rilijanto Viana ne’ebé hakerek kona-ba “Entre o sonho e a precariedade: a vida dos timorenses que emigraram para Portugál” mak sai manán-na’in ba The Best Balibo Five no jornalista husi mídia Agência TATOLI, Cidalia Fátima, ho obra ” Tinan 7 hein justisa: Maria nia luta atu kontinua estudu” mak sai manán-na’in ba Prémiu Greg Shackleton Media Awards 2026 iha ámbitu selebrasaun loron nasionál liberdade imprensa ba da-haat.
Jornalista mídia Dilijente, Rilijanto Viana, hato’o obrigadu ba Konsellu Imprensa ne’ebé indika ona nia sai manán-na’in ba kompetisaun obra jornalístiku nian iha tinan 2026.
“Ha’u laiha konfiansa katak bele konkista prémiu hirak ne’e, entaun ne’e sai hanesan motivasaun ida atu nune’e bele kontinua habelar nafatin informasaun liuliu buka aspirasaun no problema sosiál,” jornalista ne’e dehan ba Agência Tatoli iha CCD, ohin.
Tuir nia, reportajen kona-ba asuntu sosiál ne’e importante tebes tanba bele sente no haree rasik difikuldade ne’ebé sosiedade sira enfrenta durante ne’e. Aleinde jornalista hanesan fonte informadór normalmente tenke lori fali aspirasaun ne’e ba Governu hodi tau atensaun.
“Reportajen ne’ebé ha’u halo barak liu mak foku ba komunidade nia moris loro-loron, difikuldade ne’ebé sira hasoru no sira sente vulneravel tebes tanba laiba ema ida mak atu tau matan ba sira,” nia dehan.
Nia dehan, ho informasaun ne’ebé mak públika bele iha mudansa asaun solidariedade husi Governu atu tau matan ba komunidade iha baze, maske la’ós lalais maibé neineik sei iha solusaun.
Enkuantu prémiu The Best Balibo Five Media Awards ba kategòria “the best of the best” atribui ba jornalista husi mídia Dilijente, Rilijanto Fátima Viana ho obra “Entre o sonho e a precariedade: a vida dos timorenses que emigraram para Portugál”.
Prémiu Greg Shackleton kategória reportajen ba asuntu sosiál di’ak liu iha Rádiu no televizaun atribui ba jornalista husi mídia Agência Tatoli, Cidalia Fátima, ho obra ” Tinan 7 hein justisa: Maria nia luta atu kontinua estudu”.
Prémiu Bernardino Guterres kategória foto jornalizmu di’ak-liu ba asuntu sosiál iha mídia online no jornál, atribui ba jornalista mídia Hatutan.com, Junival Cabral dos Santos.
Prémiu Francisco Borja da Costa, kategória reportajen asuntu sosiál di’ak-liu iha jornál no online, atribui ba jornalista Dilijente, Lourdes do Rêgo titulu obra” Entre o accesso e o perigo: quem protege as crianças no espaço digital em Timor-Leste”.
Prémiu Adelino Gomes, kategoria mellor reportajen iha lian portugés, atribui ba jornalista Dilijente, Rilijanto Fátima Viana, ho titulu obra” Entre o sonho e a precariedade: a vida dos timorenses que emigraram para Portugal”.
Prémiu Konsellu Imprensa kategória mellor orgaun komunikasaun sosiál, atribui ba orgaun komunikasaun sosiál Eto Telco.
Jornalista : Alexandra da Costa
Editór : Cancio Ximenes
