Empreza Feliciano prepara ona materiál konstrusaun atu reabilita estrada Karaubalu bá Uma-Ki’ik
VIKEKE, 16 Outubru 2026 (TATOLI)—Empreza Feliciano Unipessoal, Lda. hahú ona servisu limpeza ba projetu reabilitasaun estrada Pakote I, ne’ebé liga Suku Karaubalu ho Suku Uma-Ki’ik no Kainluik, Postu Administrativu Vikeke Vila, Munisípiu Vikeke. Servisu limpeza hahú iha fulan-Setembru liubá, no agora empreza kontinua prepara materiál konstrusaun.
Xefe Suku Uma-Ki’ik, Claudinho Amaral, hateten katak servisu limpeza estrada nian ramata ona, no empreza agora prepara materiál hanesan fatuk no rai-henek atu kontinua ba faze konstrusaun.
“Reabilitasaun estrada Pakote I husi Suku Karaubalu liga ba ami-nia suku, empreza hahú limpeza iha fulan-Setembru no servisu limpeza ramata ona. Agora daudaun, empreza prepara hela materiál konstrusaun hanesan fatuk no rai-henek,” Claudinho Amaral hateten ba TATOLI, iha Postu Administrativu Vikeke Vila, Sesta ne’e.
Nia esplika katak durante ne’e, komunidade Suku Uma-Ki’ik enfrenta difikuldade ba movimentu tanba kondisaun estrada aat, liuliu durante tempu udan, ne’ebé afeta transporte no ema-nia viajen.
“Agora, Governu liuhusi Ministériu Obra Públika (MOP), tau ona estrada ne’e iha prioridade no servisu hahú ona. Ami-nia komunidade nia preokupasaun hetan ona resposta. Ha’u kontinua akompaña implementasaun obra ne’e atu ajuda rezolve problema sosiál ne’ebé mosu no asegura katak empreza hala’o servisu ho di’ak,” nia afirma.
Claudinho Amaral espera katak, ho reabilitasaun estrada ne’e, movimentu komunidade sei fásil liután no transporte la enfrenta difikuldade hanesan antes, liuliu durante tempu udan.
Iha parte seluk, Koordenadór Infraestrutura Destakadu MOP Munisípiu Vikeke, Mário Ângelo Menezes, hateten katak projetu reabilitasaun estrada Pakote I ne’e atribui diretamente ba Empreza Feliciano, ne’ebé hala’o servisu hamutuk ho Empreza Oven II.
Nia esplika katak servisu hahú ho limpeza estrada, depoiz sei kontinua ho konstrusaun ezgotu bee no aterru, antes tama ba faze nahe aspál.
“Projetu ne’e atribui diretamente ba Empreza Feliciano, ne’ebé servisu hamutuk ho Empreza Oven II. Iha faze dahuluk, sira halo limpeza estrada, depoiz sei konstrui ezgotu no aterru, hafoin mak tama ba faze nahe aspál,” Mário Ângelo Menezes hateten.
Tuir nia, estrada ne’e iha naruk liu kilómetru neen (6), ho largura jerál metru sia (9), enkuantu parte ne’ebé sei bá aspál iha largura metru lima (5). Ezgotu bee no estrutura drenajen seluk sei kompleta projetu ne’e.
Nia hatutan katak orsamentu ba reabilitasaun estrada ne’e liu US$200.000, ho durasaun implementasaun tinan ida.
Kontekstu
Governu Timor-Leste, liuhusi MOP, iha fulan-Juñu 2026 asina kontratu ho empreza manán-na’in ba projetu estrada rurál hamutuk 16 iha Munisípiu Vikeke no Manufahi, nu’udár parte husi programa Road for Development (R4D). Projetu sira-ne’e iha objetivu atu fasilita movimentu komunidade rurál, inklui asesu ba eskola, ospitál no merkadu.
Lee notísia relevante: MOP selebra kontratu ho empreza manán-na’in reabilita estrada rurál pakote 16 iha Vikeke-Manufahi.
Notísia seluk kona-ba infraestrutura estrada iha Munisípiu Vikeke bele asesu iha: Autoridade Vikeke lansa reabilitasaun estrada rurál Iraler liga bá Daralari Uatulari.
Jornalista: Vitorino Lopes da Costa
Editór: Xisto Freitas da Piedade
