Klinika Bairru Pite husu inan-aman atu prepara aihan nutritivu ba oan sira
DILI, 16 Outubru 2026 (TATOLI)—Prezidente Fundasaun Klinika Bairo Pite, Inacio dos Santos, husu inan-aman sira prepara aihan nutritivu di’ak ba oan sira nune’e labele monu ba kazu mánutrisaun.
“Ba sira-ne’ebé mak mánutisaun moderadu halo follow up kada fulan, sira mai, nune’e ita hanorin inan sira oinsá prepara aihan ne’ebé mak saudavel no aihan ne’ebé mak nutritive. Maibé sira-ne’ebé mak nutrisaun grave ita follow up kada semana sira mai tetu, atu nune’e ita nia nutrisionista no médiku sira halo monitorizasaun ba sira iha kresimentu ba sira-nia todan,” Inacio dos Santos hateten iha nia kna’ar fatin, Klinika Bairru Pite, ohin.
Nia relata, loloos médiku sira tenke fó suplementu ne’ebé mak sira presiza, ezemplu hanesan superserial sira-ne’ebé mak fornese ba oan sira-ne’e mínimu loos, entaun ho ida-ne’e mak tenke hanorin inan sira tenke prepara aihan ne’ebé mak bele substitui no aihan sira-ne’ebé mak loloos apoia mai husi Governu liuliu Ministériu Saúde.
“Meiu ida suplay mai Klinika Bairru Pite mak la to’o, tanba dalaruma mil ital kada tinan signifika suplay tenke masimu. Agora suplay ne’ebé mak mai minimu loos no seidauk to’o fulan klaran estoke out ona. Entaun ita-nia suplementu ne’ebé mak ita fó ne’e fornese barak ita foku ba sira-ne’ebé mánutrisaun grave, tanba sira mai kada semana,” nia afirma.
Problema mak kapasidade inan-aman atu sosa ne’e laiha no atu asesu ba aihan nutritivu ne’e laiha, tanba populasaun barak mak atu hetan dolar ida ne’e susar tebes. Entaun, ida-ne’e mak difikuldade ne’ebé mak Timor-Leste hasoru.
“Dalabarak ita sujere ba inan sira ka familia sira sosa aihan nutritivu atu fó ba nia oan sira, maibé la konsege tanba osan laiha, entaun suplementu ne’ebé mak iha ita foku ba sira-ne’ebé mak vulneravel,” nia hateten.
Nia informa, Klinika Bairru Pite mós rejista kazu mánutrisaun hamutuk 1000-resin ne’ebé mak deteta durante Janeiru mai to’o agora husi númeru ne’e iha 742 mak mánurtsaun kazu moderadu no 408 mak ho mánutrisaun grave.
“Banhira deteta mak mánutrisaun grave, ita halo transferénsia ba Hospitál Nasionál Guido Valadares hodi halo tratamentu espesialista nian,” nia dehan.
Jornalista : Flicidade Ximenes
Editór : Cancio Ximenes
