Marsa liberdade haforsa kompromisu jornalista no komunidade atu kontra “Hoax”
DILI, 16 Outubru 2026 (TATOLI)—Asosiasaun Rádiu Komunidade Timor-Leste (ARKTL), sesta ne’e, realiza marsa liberdade iha ámbitu selebrasaun loron nasionál liberdade imprensa ba da-haat ne’ebé ho tema “Mídia livre, demokrásia metin”.
Atividade marsa liberdade ne’e ARKTL hala’o hamutuk ho jornalista ne’e, hahú husi Palásiu Governu oin to’o iha Sentru Konvensaun Dili (CCD, sigla portugés).
Prezidente Rádiu Komunidade Timor-Leste, Prezaldo Ximenes, hateten marsa liberdade ne’e ho objetivu atu haforsa liután kompromisu husi jornalista sira-nian ho komunidade atu kontra publikasaun “Hoax” ne’ebé bele fó ameasa ba ema seluk.
“Entaun iha marsa liberdade ne’e sei partisipa mós husi estudante sira ne’ebé sei fó sira-nia, aspirasaun kona-ba liberdade imprensa liuhusi jornál parede ka parede liberdade ne’ebé ami prepara ona iha CCD,” Prezidente ARKTL ne’e informa ba Agência Tatoli iha CCD, ohin.
Nune’e mós, Jestora Rádiu Komunidade Komoro, Elisabet Pires, hateten iha ámbitu selebrasaun loron nasionál liberdade imprensa hanorin ema oinsá atu luta ba liberdade imprensa iha Timor-Leste hodi kontinua fó sai informasaun ne’ebé loos ba públiku.
“Jornalista husi plataforma oioin sira hola papel importante hodi garante nafatin kredibilidade informasaun ne’ebé aspira husi komunidade no Governu. Signifika ita sai hanesan fonte ba informasaun,” Jestora RCC ne’e relata ba Agência Tatoli iha Palásiu Governu oin, ohin.
Nia hatutan, loron ida-ne’e la’ós ita atu selebra de’it maibé oinsá mak atu tau hamutuk ideia hodi kontinua promove liberdade imprensa ne’ebé buras ba bebeik iha Estadu demokrátiku ida-ne’e.
“Labele iha tan ona limitasaun informasaun husi fontes sira, tanba audiénsia hakarak asesu informasaun ne’ebé loos no kredivel, entaun ita presiza koopera malu hodi ezerse ida-idak nia funsaun ho di’ak no responsabilidade,” nia hateten.
Tuir nia, prezensa Rádiu Komunidade mós importante tebes tanba bele tatoli lian husi baze (komunidade rurál) ba iha nasionál, signifika imprensa mós hola parte ba prosesu konstrusaun nasaun ida-ne’e tanba sein iha informasaun mak ema mós sei lahatene ema ida-nia istória ida.
Enkuantu iha selebrasaun loron nasionál liberdade imprensa ne’e, atividade sira-ne’ebé hala’o mak hanesan diskusaun meza redonda kona-ba “seguransa jornalista, kobertura iha eleisaun”, misa agradesimentu, presta omenajen (kari aifunan iha Palásiu Governu oin), meet the press no atribuisaun prémiu ba jornalista 2026.
Jornalista : Alexandra da Costa
Editór : Cancio Ximenes
