MJDAK-AFTL fahe informasaun kona-ba prosesu selesaun membru Parlamentu Foinsa’e iha Kovalima
KOVALIMA, 16 Outubru 2026 (TATOLI) – Ministériu Juventude, Desportu, Arte no Kultura (MJDAK), hamutuk ho Asosiasaun Foinsa’e Timor-Leste (AFTL), hala’o atividade sensibilizasaun kona-ba prosesu selesaun no eleisaun ba membru Parlamentu Foinsa’e (MPF), iha Munisípiu Kovalima.
Reprezentante MJDAK, Moniz Gonçalves, hateten katak atividade sensibilizasaun ne’e ho objetivu atu fahe informasaun ba joven sira kona-ba polítika no implementasaun programa Parlamentu Foinsa’e, inklui kna’ar MJDAK nian iha programa refere.
“Kona-ba kritériu selesaun, joven sira bele asesu informasaun liuhusi pájina ofisiál AFTL atu hatene kritériu no prosedimentu sira ne’ebé aplika ba prosesu eleisaun membru Parlamentu Foin Sa’e” Reprezentante MJDAK, Moniz Gonçalves, dehan ba jornalista sira iha salaun postu Administrativu Suai.
Tuir Rezolusaun Governu nian iha tinan 2024, joven sira ho idade entre tinan 12 – 17 bele partisipa iha prosesu selesaun ba membru Parlamentu Foin Sa’e ba períodu 2027–2029.
Atividade sensibilizasaun ne’e hala’o ona iha munisípiu sira iha territóriu Timor-Leste tomak no remata ona iha Suai, Munisípiu Kovalima.
MJDAK iha kna’ar atu asegura implementasaun programa Parlamentu Foinsa’e. Programa ne’e, hahú husi períodu dahuluk to’o agora, kontribui ba promosaun lideransa joven sira, inklui estudante sira husi Eskola Bázika Central (EBC) sira .
Parlamentu Foinsa’e nu’udar espasu ba foinsa’e sira ho idade 12-17 atu aprende no prátika demokrásia, lideransa no formasaun sidadania hodi sai sidadaun sivíku no responsavel.
Kritériu sidadaun Timor-oan ho idade 12-17, fotokópia BI, Sertidaun RDTL, dokumentu legál relijiaun aplikante ni’an naturalidade postu Administrativu lokalizadu ,deklarasaun suku,foto kopia dokumentu inan aman no la asume kargu iha partidu polítiku.
Aluna husi Eskola Kafe, Juvenia Fiviana Exposto Cardoso, haktuir katak nia kontente tanba bele partisipa iha atividade sensibilizasaun ne’e atu hetan informasaun kona-ba prosesu selesaun membru Parlamentu Foinsa’e.
“Ami sente katak sensibilizasaun informasaun ne’e importante ba ami, tanba bele ajuda ami atu hatene oinsá prosesu selesaun ne’e hala’o no saida mak kritériu sira atu tuir prosesu ne’e,” nia dehan.
Notisia relevante:Rejistu ba kandidatu Parlamentu Foinsa’e komesa iha semana oin
Jornalista: Celestina Teles
Editór: Florencio Miranda Ximenes
