MSSI kontinua prioriza programa inkluzaun sosiál iha tinan oin
DILI, 16 Outubru 2026 (TATOLI) – Ministériu Solidariedade Sosiál no Inkluzaun (MSSI) iha proposta Orsamentu Jerál Estadu (OJE) 2027 prevee $24.845.325 hodi finansia programa funsionamentu no dezenvolvimentu instituisionál ho inkluzaun sosiál.
Ministra Solidariedade Sosiál no Inkluzaun, Verónica das Dores, iha audiénsia públika, ho Komisaun F iha Parlamentu Nasionál ba Asuntu Saúde, Igualdade Jéneru no Inkluzaun Sosiál, aprezenta katak alokasaun orsamentu tinan ne’e hetan aumentu ne’ebé destina ba apoia inan isin-rua, konstrui uma ba família vuneravel sira, no estabelese sentru atendimentu liña solidária.
Montante proposta OJE 2027 ne’e aloka ba saláriu no vensimentu $4.303.740, bens no servisu $8.030.756, transferénsia públika $12.251.672, kapitál menór rihun $50, no kapitál dezenvolvimentu $209.157.
Orsamentu ne’e mantein finansia programa funsionamentu no dezenvolvimentu instituisionál ho nia subprograma haat, programa inkluzaun sosiál ho nia subprograma 11, hanesan protesaun ba labarik iha risku no perigu, protesaun no promosaun direitu ema ho defisiénsia, protesaun solidariedade sosiál no inkluzaun, inkluzaun sosiál, reintegrasaun komunitária, implementasaun rezolusaun 1325 ONU nian, implementasaun violénsia bazeia ba jéneru, apoiu veíkulu funeráriu no kaixaun, bolsa da mãe, asisténsia sosiál no umanitária, reabilitasaun no reintegrasaun ema ho problema mentál no defisiénsia.
Iha ámbitu audiénsia ne’e governante ne’e hato’o ministériu nia ezekusaun orsamentál tinan ne’e, husi Janeiru to’o Outubru, ne’ebé atinje 64,43%, husi montante inisiál millaun 24.741.600, ne’ebé finansia programa rua, subprograma 15 no atividade 83.
Verba ne’e ezekuta ona ba atividade lubun hanesan inkluzaun sosiál hodi apoia bolsa da mãe kondisionál no grupu vuneravel sira, apoia ema ho defisiénsia, apoiu umanitáriu, apoiu karu funeráriu no transladasaun mate isin husi rai-li’ur, apoia programa violénsia bazeia ba jéneru no inan menoridade ne’ebé isin-rua sedu ho seluk tan ho totál benefisiáriu hamutuk rihun 33-resin iha territóriu.
Jornalista: Nelson de Sousa
Editora: Maria Auxiliadora
