Proposta OJE 2027 husi PCM hetan redusaun millaun $3-resin
DILI, 16 Outubru 2026 (TATOLI) – Ministru Prezidénsia Konsellu Ministru (PCM, sigla portugés) nia proposta Orsamentu Jerál Estadu (OJE) 2027 hetan redusaun millaun $3-resin, nune’e orsamentu ne’ebé prevee ba tinan oin mak $4.982.253.
Sekretáriu Estadu Komunikasaun Sosiál (SEKOMS), Expedito Dias Ximenes, dehan montante ne’e aloka ba saláriu no vensimentu $3.108.303, no bens no servisu $1.873.950.
Verba ne’e sei finansia programa funsionamentu no dezenvolvimentu instituisionál ho nia subprograma ida, programa polítika estratéjia nasionál ho ninia subprograma neen mak hanesan apoiu Primeiru-Ministru iha koordenasaun Governu no Prezidénsia Konsellu Ministru, governasaun legál Konsellu Ministru, prestasaun servisu tradusaun, polítika públika, komunikasaun estratéjika Governu no promosaun sidadania, no asuntu parlamentár.
Nia esplika katak redusaun ne’e tanba Komité Revizaun Orsamentu prepara verba bazeia ba polítika prioridade Governu nian ne’ebé orsamentu foku liu oinsá bele halo ba iha setór sira ne’ebé prioritáriu, liuliu nafatin fó atensaun ba infraestrutura, saúde, edukasaun, no diversifikasaun ekonómika.
Aleinde ne’e, boa governasaun no fó atensaun ba Eleisaun Prezidensiál iha 2027 no posibilidade munisípiu balun bele iha eleisaun podér lokál, preparativu infraestrutura ba Timor-Leste atu asume Prezidénsia ASEAN iha 2029.
Governante ne’e mós relata kona-ba ezekusaun orsamentu ministériu nian iha tinan ne’e, ne’ebé atinje ona 80,6% ka ekivale millaun $4,9-resin husi montante inisiál millaun $7,4.
Iha audiénsia públika ho Komisaun A iha Parlamentu Nasionál ne’ebé trata Asuntu Konstitusionál no Justisa, sekretáriu Estadu mós aprezenta proposta OJE 2027 husi Gabinete Primeiru-Ministru ho montante $3.711.527, ne’ebé aloka ba saláriu no vensimentu $1.222.478, no bens no servisu $2,489,049.
Verba ne’e atu finansia programa funsionamentu no dezenvolvimentu institusionál ho subprograma rua.
Programa lidera estratéjia polítika Governu no polítika nasionál ho subprograma haat hanesan delimitasaun fronteira terrestre no marítima, planeamentu estratéjiku ba dezenvolvimentu, lidera no koordena dezenvolvimentu Projetu Tasi Mane, no ekonomia azúl.
Iha audiénsia ne’e mós aprezenta ezekusaun orsamentu 2026 husi Gabinete Primeiru-Ministru ne’ebé atinje 88,6% husi montante orijen $3.697.532.
Prezidente Komisaun A, Natalino dos Santos, hatete Governu liuhusi liña ministeriál sira iha devér halo aprezentasaun ba progresu ezekusaun ba deputadu sira atu hatene no prioridade orsamentu ba tinan oin.
“Ami haree husi Ministru Prezidénsia Konsellu Ministru ho Gabinete Primeiru-Ministru sira-nia ezekusaun di’ak, kuaze 80%, tuir programa projeta”, nia dehan.
Jornalista: Nelson de Sousa
Editora: Maria Auxiliadora
