WorldFish identifika suku tolu iha Kovalima hodi implementa projetu IKANADAPT
KOVALIMA, 16 Outubru 2026 (TATOLI) – WorldFish iha Timor-Leste identifika ona suku Suai Loro, Maudemo no Tashilin, iha Munisípiu Kovalima, nu’udar área-alvu ba implementasaun Projetu IkanAdapt, ne’ebé foka ba hametin kapasidade juventude iha atividade peska reziliente ba mudansa klimátika no konservasaun rekursu tasi nian.
Projetu ne’e sei hala’o durante fulan-neen, ho apoiu orsamentu hamutuk US$16.000, liuhusi parseria entre WorldFish no Sentru Juventude Kovalima (CJC).
Koordenadór Projetu IkanAdapt iha WorldFish Timor-Leste, Almerindo Oliveira, hateten katak, projetu ne’e nia objetivu mak atu aumenta partisipasaun juventude, mane no feto, ho idade entre tinan 17 no 35, iha setór peska, liuliu iha komunidade kosteira sira ne’ebé nia moris depende ba rekursu tasi nian.
Nia esplika katak peskiza balu hatudu peskadór barak iha Timor-Leste mak mane ho idade tinan 45 ba leten. Tanba ne’e, projetu ne’e hakarak haburas oportunidade ba juventude atu envolve an iha atividade peska no dezenvolve kapasidade atu adapta ba impaktu mudansa klimátika.
“Objetivu mak atu envolve juventude iha atividade peska, liuliu iha suku kosteira sira ne’ebé komunidade depende barak ba tasi,” Almerindo Oliveira dehan liuhusi nia diskursu iha salaun CJC.
Nia aumenta katak, hafoin lansamentu no sosializasaun projetu, WorldFish sei kontinua servisu hamutuk ho CJC atu dezenvolve inisiativa sira ne’ebé envolve juventude iha komunidade kosteira.
Enkuantu ne’e, Diretór Ezekutivu Sentru Juventude Kovalima, Júlio Ferreira, konsidera katak Projetu IkanAdapt nu’udar programa importante ida atu haforsa envolvimentu juventude iha atividade peska reziliente ba mudansa klimátika no konservasaun ambiente tasi nian.
Nia apela ba juventude sira atu iha responsabilidade hamutuk hodi tau matan ba rekursu tasi nian, liuliu liuhusi hahalok ne’ebé evita poluisaun no estragu ba biodiversidade tasi nian.
“Juventude sira presiza komprende katak tasi mak ita-nia riku-soin hamutuk. Tanba ne’e, ita hotu iha responsabilidade atu konserva tasi, atu nafatin sai fonte moris ba jerasaun agora no jerasaun futuru,” Júlio Ferreira dehan.
Iha parte seluk, reprezentante Prezidente Autoridade Munisípiu Kovalima, Maria de Jesus Ferreira, husu atu iha koordenasaun di’ak entre entidade sira ne’ebé envolve iha implementasaun projetu, inklui administradór postu administrativu Zumalai, Suai no Tilomar.
Nia mós enkoraja atu uza orsamentu ho transparénsia no responsabilidade, hodi asegura katak apoiu ne’ebé WorldFish fó liuhusi CJC bele lori rezultadu ne’ebé di’ak ba komunidade.
Maria subliña katak implementasaun projetu tenke fó oportunidade hanesan ba juventude feto no mane, inklui haforsa kapasidade feto sira atu partisipa iha atividade peska no konservasaun rekursu tasi nian.
Programa IkanAdapt mak foku ba haforsa kapasidade adaptasaun, reziliénsia, no konservasaun biodiversidade ba komunidade sira ne’ebé moris husi peska no akuakultura hasoru dezafiu mudansa klimátika iha Timor-Leste.
Programa ne’e implementa husi Organizasaun Ai-han no Agrikultura Nasionál Unidu nian (FAO) ho parseiru ezekutór WorldFish hamutuk ho Diresaun Jerál Peska, Akuakultura no Jestaun Rekursu Mariñu Timor-Leste. Hetan mós finansiamentu husi Global Environment Facility (GEF)
Objetivu husi programa ne’e mak ajuda peskadór no agrikultór sira atu nune’e sira-nia moris ka rendimentu labele estraga tanba de’it mudansa klimátika (hanesan bailoro naruk, udan boot la tuir tempu, ka tasi manas) no proteje ekosistema tasi nian.
Jornalista: Celestina Teles
Editór: Florencio Miranda Ximenes
