APC alerta komunidade Kovalima mantein ambiente moos hodi prevene inséndiu
KOVALIMA, 17 Outubru 2026 (TATOLI)–Autoridade Protesaun Sivíl (APC, sigla portugés) Munisípiu Kovalima alerta ba komunidade atu mantein ambiente moos no hamoos lixu iha uma-hun no sira-nia área hela-fatin, liuliu durante tempu bailoro naruk, hodi prevene risku inséndiu.
“Alerta ne’e atu hanorin ita-nia komunidade kona-ba importánsia hamoos ambiente no evita hahalok ne’ebé bele hamosu dezastre naturál, liuliu inséndiu ne’ebé bele akontese tanba neglijénsia umana,” Komandante APC Kovalima, Celestino Afonso Ferreira, hato’o alerta ba komunidade relasiona bailoro naruk, ba jornalista TATOLI iha Kovalima.
Ho nune’e, nia dehan, durante tempu bailoro naruk ne’e komunidade tenke kuidadu ho lixu no evita soe sigarru latun arbiru, tanba ahi husi sigarru ne’ebé seidauk mate tomak bele kona ba du’ut maran ka materiál seluk ne’ebé fasil atu sunu no hamosu inséndiu.
Tanba ne’e, komunidade hotu-hotu hetan apelu atu hametin kuidadu ba ambiente, hamoos uma-hun no área sira hale’u uma, no la soe lixu arbiru. Hahalok simples hanesan ne’e bele ajuda hamenus risku inséndiu no prevene dezastre ne’ebé bele hamosu prejuízu ba ema no sira-nia propriedade.
Komunidade mós presiza hametin konsiénsia no responsabilidade hamutuk atu mantein ambiente moos no seguru, hodi proteje an rasik, família no komunidade tomak husi perigu inséndiu durante tempu bailoro naruk.
Iha sorin seluk, abitante Angelina do Carmo informa katak alerta husi APC ne’e importante atu ema hotu hamoos nia uma hun hodi bele hadook an husi inséndiu tanba daudaun ne’e tempu bailoro naruk
“Loos, ita presiza hamoos ita-nia uma ninin, nune’e bainhira ema ruma soe sigarru latun bainhira ahi lakan ba to’o ita-nia uma rasik,” nia dehan.
Jornalista : Celestina Teles
Editór : Cancio Ximenes
