FFTL Aprova Relatóriu Finanseiru no Atividade 2025 ho Votu Unanimidade
DILI, 17 Outubru 2026 (TATOLI)–Federasaun Futeból Timor-Leste (FFTL), Sábadu ne’e, realiza kongresu anuál atu aprezenta relatóriu atividade no finanseiru ba tinan 2025 no hili membru komité independente na’in-10 ba períodu 2026-2030.
Relatóriu finanseiru no programa atividade FFTL ba tinan 2025 hetan aprovasaun ho votu unanimidade ho votu afavór 21, kontra zero no abstensaun zero, husi kongresista sira-ne’ebé reprezenta asosiasaun futeból munisipál.
Iha kongresu ne’e, kongresista sira mós hili membru komité independente na’in-10 ba períodu 2026-2030, ho rezultadu votasaun afavór 21, kontra zero no abstensaun zero.
Prezidente FFTL, Nilton Telmo Gusmão dos Santos, hatete kongresu ne’e realiza tuir estatutu federasaun nian, atu membru sira bele haree no avalia relatóriu kona-ba gastu no ezekusaun orsamentu durante tinan kotuk.
“Ohin, ita halo kongresu extraordinária hodi aprezenta konta sira-ne’ebé federasaun gasta durante ne’e ba membru asosiasaun sira, atu bele hetan apresiasaun liuhusi sira-nia votu, nune’e ita bele taka tiha ita-nia ezekusaun orsamentu 2025 nian,” nia dehan ba jornalista sira iha Otél Timor.
Nilton Gusmão esplika, kongresu ne’e envolve asosiasaun futeból munisipál, asosiasaun futeból profisionál no klubu sira ne’ebé kompete iha primeira no segunda divizaun.
Nia husu ba parte hotu atu kontinua hametin unidade no kooperasaun hodi alkansa objetivu komún, mak transforma futeból sai orgullu nasionál.
“Tempu ona para ita atu kontinua organiza-an, kontinua halo kooperasaun ne’ebé di’ak, atu ita bele alkansa objetivu ne’ebé ita hakarak hodi transforma futeból sai orgullu nasionál,” nia afirma.
Tuir Nilton, durante ne’e FFTL fó atensaun ba dezenvolvimentu infraestrutura desportiva, maibé federasaun kontinua hala’o mós programa sira atu dezenvolve futeból no fó oportunidade ba joven sira atu partisipa iha kompetisaun internasionál.
Nia dehan, futeból kontinua dezenvolve iha sosiedade Timor-Leste, liuliu ho partisipasaun ativa husi asosiasaun futeból munisipál sira ne’ebé organiza kompetisaun ba joven sira iha kategoria Sub-15 no Sub-17.
“Ita-nia futeból kontinua moris iha ita-nia sosiedade, nune’e buat ne’ebé ita halo iha tinan kotuk no tinan ne’e buat hotu lao ho di’ak ho partisipasaun ativa asosiasaun futeból munisipál sira-nian, tanba sira iha munisípiu organiza ona atividade futeból ba Sub-15 no Sub-17,” nia dehan.
Nia subliña, dezenvolvimentu futeból la’ós de’it iha kapitál Dili maibé tenke to’o mós ba munisípiu sira hotu.
Nilton espera katak programa no atividade futeból ne’ebé FFTL no asosiasaun sira hala’o bele kontinua hadi’a no hetan rezultadu di’ak liután iha tinan sira tuirmai.
Jornalista : Osória Marques
Editór : Cancio Ximenes
