Governu lansa Ataúru Weekly Export Market
ATAURU, 16 Outubru 2026 (TATOLI) – Governu liuhusi Ministériu Komérsiu no Indústria (MCI) lansa Atauro Weekly Export Market ho tema “Promove Komérsiu Fronteira no Hametin Ekonomia Komunidade”, iha ámbitu komemorasaun Loron Ai-han Mundiál, iha Aldeia Usubemasu, Suku Beloi, Postu Administrativu Atauru.
Atividade ne’e lansa husi Ministru Komérsiu no Indústria, Nino Pereira, akompaña husi Prezidente Autoridade Atauro, Mateus Belo, Embaixadór Índia, Patiyal, delegasaun husi Indonézia, liñas ministeriais, PNTL, F-FDTL, reprezentante Igreja no komunidade Atauru.
Ataúru Weekly Export Market ho objetivu atu promove komérsiu fronteira entre Timor-Leste no Indonézia, loke asesu merkadu ba produtu lokál Atauru nian, liu-liu produtu agrikultura, peska, artezenatu no produtu transformadu ne’ebé orgániku no iha kualidade.
“Ohin loron ne’e loron importante tebes ba ita hamutuk iha ne’e la’ós de’it atu komemora Loron Ai-han Mundiál, maibé atu loke dalan foun ba ita nia ekonomia, liu-liu ba ita nia komunidade iha Atauro,” Ministru, Nino Pereira hateten iha nia intervensaun, sesta ne’e.
Nia dehan Ataúru Weekly Export Market la’ós de’it merkadu baibain, maibé pasu importante atu transforma poténsia lokál sai oportunidade ekonómika.
“Ataúru la’ós de’it illa turístika, maibé mós sentru ekonómiku foun ba komérsiu fronteira. Merkadu ne’e sei funsiona nu’udar merkadu exportasaun semanál, fatin atu hatudu, promove no fa’an produtu lokál direitamente ba kompradór nasionál no internasionál, liuliu husi Indonézia,” Ministru hateten.
Iha fatin hanesan, Prezidente Autoridade Munisípiu Ataúru, Mateus Belo, subliña katak ho lansamentu Export Market ne’e, Governu hakarak transforma poténsia lokál.
“Ida-ne’e importante tebes ba ita Atauru oan, inisiativa ne’e hanesan meiu ida atu hasa’e rendimentu reál ba komunidade, hametin relasaun di’ak ho Indonézia, no hametin Timor-Leste nia integrasaun iha ASEAN,” Mateus Belo katak.
Mateus Filipe, hanesan komunidade Ataúru ne’ebé partisipa iha eventu ne’e hateten, kontente tanba Governu bele fasilita sira oinsa halo ligasaub ekonómiku ho Indonézia.
“Ami kontente tebes ho merkadu ida ne’e, tanba ami nia produtu lokál agora bele hetan merkadu ne’ebé luan no bele ajuda ami nia rendimentu família,” nia dehan.
Komunidade seluk, Santina Belo, mós haktuir katak, atividade merkadu livre ne’ebé Governu lansa ona kontinua nafatin ba oin atu nune’e komunidade Atauru no Liran bele halo negósiu ba malu.
“Merkadu ne’e ajuda ami, liu-liu inan sira ne’ebé produs ai-han no artezenatu. Ami espera merkadu ne’e kontinua no la’ós de’it lansamentu ida. Ita-nia lamuk sira husi sorin mós mai sosa ita-nia sasan, sira mós lori sira nia sasan mai ita sosa, relasaun ne’e labele mate de’it iha ne’e,” nia dehan.
Atividade ne’e hatudu kompromisu Governu nian, liuhusi hadi’a kualidade produtu, hametin emprezáriu lokál no hametin relasaun amizade ho nasaun viziñu, nune’e mós hametin seguransa ai-han no promove konsumu produtu lokál.
Ba oin komunidade Ataúru no illa sira besik iha Atauru husi Indonézia bele ona halo negósiu ba malu liuliu fan sasan ba mai ho livre maibé tenke tuir nafatin regulamentu ne’ebé vigora ona iha nasaun rua.
Jornalista: Hortêncio Sanchez
