HNGV selebra loron mundiál Anestesia ho “Before, During and Beyond Surgery”
DILI, 17 Outubru 2026 (TATOLI)—Diretor Apoio Diagnostiku no Terapeutiku HNGV, Vidal de Jesus Lopes, hateten HNGV selebra loron mundiál anestesia ho tema “Before, During and Beyond Surgery” ne’e, tanba Departamentu Anestesia mak sai hanesan sentru ka fuan husi ospital nian.
Hospital Nasional Guido Valadares liuhusi Departamentu Bloku Operatóriu no Anestesia hamosu tan tema ba selebrasaun loron mundiál anestesia ne’ebe realiza HNGV katak “Iha operasaun sira-ne’ebé susesu nia kotuk iha eroi sira-ne’ebé sempre monitoriza pasiente nia fuan, batimentu, dalan iis no dada iis, EROI ne’e mak anestesia”.
“Departamentu Anestesia mak hanesan departamentu ida-ne’ebe sentru ka fuan husi ospitál nian. Tanba saida mak ha’u dehan jantung (fuan) haree ba nia lokalizasaun iha sentru ka klaran bele asesu ba unidade medisina intensiva ka ICU no enfermaria hotu-hotu. Karik departamentu ne’e mak la eziste iha HNGV, ospital labele halo intervensaun no sei haruka pasiente fila-fali ba sentru saúde,” Vidal Lopes hateten iha ámbitu loron mundiál anestesia iha HNGV, ohin.
Nia hateten, espesialista anestesia iha HNGV bele sai anesthesiolojista no intensivista depende ba sira-nia estudu ka treinamentu ne’ebe sira hetan durante estuda husi nasaun avansadu sira.
“Ha’u apresia no valoriza tebes kontribuisaun husi fundadór ne’ebé hala’o servisu tinan barak iha anestesia, tanba durante hasoru situasaun defisil sira mak luta no hadi’a departamentu bloku operatóriu no anestesia to’o ohin loron,” nia esplika.
Nia apela ba pesoál súde jerasaun foun sira kuda espíritu siénsia matenek hodi iha vontade servisu ho totalidade ba pasiente sira-ne’ebé persiza tulun iha sala operasaun.
Iha fatin hanesan, Xefe Departamentu Bloku Operatoriu sántral no Anestesia HNGV, Jose Domingos B. do C. Alves, hateten tinan ida-ne’e HNGV selebra loron mundiál anestesia ho tema Before, During and Beyond Surgery, iha tetun dehan katak Antes, Durante no Depois Operasaun, entaun tema ne’e di’ak tebes ba profisionál saúde sira atu serbí.
“Antes ba operasaun persiza preparasaun barak mak hanesan kliniku, pasiente, ekipamentu no tékniku apoiu sira hodi monitorizasaun pasiente, nune’e bele salva pasiente atu labele monu ba kondisaun krítiku,” nia hateten.
Nia husu ba pasiente sira atu tau fiar ba médiku anestesia ho ekipa, labele tauk bainhira tama mai iha sala operasaun tanba pesoál saúde sira prontu atu asegura pasiente nia vida.
Entertantu, iha selebrasaun loron mundiál anestesia ne’e partisipa husi Konsellu Diretivu HNGV, Reprezentante husi Ospitál Referál, Ospitál Rejionál, Kargu Xefia no Funsionáriu HNGV.
Jornalista : Felicidade Xmenes
Editór : Cancio Ximenes
