ME husu dirijente eskolár sira atu pontuál iha ezekusaun ezame nasionál
DILI, 17 Outubru 2026 (TATOLI)–Ministériu Edukasaun (ME) enfatiza importánsia pontualidade no koordenasaun entre diretór servisu, superintendente eskolár no inspetór eskolár sira atu asegura preparasaun ba ezekusaun Ezame Nasionál ne’ebé sei hala’o iha loron 19 Outubru 2026.
“Iha preparasaun ba ezame ne’e, pontualidade sai hanesan asuntu importante ne’ebé presiza atensaun hosi entidade edukasaun hotu, atu prosesu ezame bele la’o ho orden no tuir prosedimentu ne’ebé determina ona,” Sekretáriu Estadu Ensinu Sekundáriu Jerál no Ensinu Tékniku-Vokasionál, Domingos Lopes Lemos, dehan ba TATOLI, iha Komoro.
Governante ne’e dehan Diretór Jerál no responsável sira iha setór edukasaun presiza asegura katak preparasaun iha eskola sira la’o ho di’ak, inklui koordenasaun entre superintendente eskolár, inspetór no dirijente eskola sira.
“Ita-boot sira asegura katak iha prosesu ezame nasionál ne’e tenke garante la’o ho di’ak no susesu,” nia dehan.
Biban ne’e mós, nia apela atu di’ak liu, la’ós profesór de’it mak halo vijilánsia iha ezame nasionál maibé presiza mós envolve funsionáriu sira iha edukasaun munisipál para oinsá garante seguransa no labele akontese buat ruma.
Jornalista : Osória Marques
Editór : Cancio Ximenes
