TL-Indonézia ofisialmente asina akordu iha setór produsaun no investimentu
DILI, 17 Outubru 2026 (TATOLI)–Governu Timor-Leste liuhusi Vise-Primeiru Ministru, Minsitru Kordenadór Asuntu Ekonómiku, no Ministru Turizmu no Ambiente, Francisco Kalbuady Lay ho no Ministru Industrializasaun Indonézia, Rosan Perkasa Roeslani, ofisialmente asina akordu kona-ba promosaun no protesaun ba investimentu iha Jakarta-indonézia.
Objetivu husi akordu ne’e, atu kria kondisaun ne’ebé favorabel liu ba investimentu entre indonézia no Timor-Leste liuhusi kuadru protesaun ida no tratamentu investimentu, fasilitasaun ba prosedimentu no mekanizmu atu rezolve litijiu sira-ne’ebé bele mosu, tanba ne’e investimentu buka atu reforsa konfiansa investidór sira-nia promove fluksu kapitál no teknolojia hodi nune’e bele kontribui ba dezenvolvimentu ekonomiku no hametin kooperasuan bialterál.
“Akordu ne’e nu’udar momentu importante ida ba Timor-Leste no Indonézia kontinu servisu hamutuk iha setór oioin,” refere Vise-Primeiru Ministru no Ministru Kordenadór Asuntu Ekónomiku no Ministru Ambiente, Francisco Kalbuady Lay, hateten iha komunikadu ne’ebé TATOLI assu, ohin.
Ohin TL halo istória, la’ós de’it loron ksolok ba nasaun rua maibé mós loron istóriku ba timoroan hodi Governu Timor-Leste nia naran liuliu Primeiru-Ministru Xanana Gusmão, hakarak hato’o agradesimentu kle’an ba Governu Indonézia liuliu iha lideransa Prezidente Prabowo nian.
Liuhusi Prezidente Prabowo nia liman, ohin agradese katak ikusmai liutiha tinan barak nia laran tenta atu asina akordu ne’e, maibé ohin konsege realiza duni asinatura ba akordu ne’e.
Ministru Investimentu no Industrializasaun konsidera akordu ne’e nu’udar espasu estratéjiku atu kontinua kooperasaun ba dezenvolvimentu ekonómiku nasaun rua nian.
“Asinatura tratadu investimentu bilaterál ne’e sai pasu estratéjiku atu hametin kooperasaun iha setór ekonómiku, investimentu, no komérsiu laos deit iha nivél governu (G2G), ka empreza públika sira maibé mós parte interesada sira seluk,” Ministru Rosan Perkasa Roeslani dehan.
Indonézia nu’udar nasaun vizinu Timor-Leste nian, durante ne’e estabelese ona kooperasaun ho Timor-Leste iha setór edukasaun, saúde, komérsiu, no seluk tan.
Serimónia asina akordu ho Indonézia ne’e, Vise-Primeiru Ministru, Minsitru Kordenadór Asuntu Ekonómiku, no Ministru Turizmu no Ambiente, Francisco Kalbuady Lay, akompaña husi Ministru Transporte no Komunikasaun, Eng. Miguel Marques Gonçalves Manetelu, no Vise Ministru Komérsiu no Indústria, Agostu Trindade Junior no Embaixadora Timor-Leste ba ASEAN.
Jornalista : Felicidade Ximenes
Editór : Cancio Ximenes
