Autoridade Kovalima husu estudante finalista sira mantein disiplina no responsabilidade

KOVALIMA, 19 Outubru 2026 (TATOLI) – Sekretáriu Asuntu Sosiál no Organizasaun Komunitária Munisípiu Kovalima, Filomeno Cardoso, hato’o pontu prinsipál tolu ba estudante finalista sira ne’ebé partisipa iha Ezame Nasionál ba tinan letivu 2026.

Pontu prinsipál tolu ne’e mak estudante sira tenke iha konfiansa ba an rasik, hala’o ezame ho onestidade, disiplina no responsabilidade no labele tauk ka lakon esperansa bainhira enfrenta dezafiu iha prosesu ezame.

“Ezame Nasionál la’ós de’it atu sukat koñesimentu estudante sira, maibé mós atu avalia rezultadu prosesu ensinu no aprendizajen, inklui preparasaun estudante sira atu kontinua sira-nia estudu ba nivel ensinu superiór” , Filomeno hato’o mensajen ne’e iha serimónia lansamentu Ezame Nasionál ba Ensinu Báziku, Ensinu Sekundáriu Jerál no Ensinu Tékniku-Vokasionál (TECVOC), ne’ebé hala’o iha Eskola Sekundária Jerál Públika Suai, Munisípiu Kovalima, segunda-feira

Nia mós subliña katak edukasaun mak responsabilidade hamutuk entre instituisaun governamentál, família, eskola no komunidade, tanba iha ligasaun direta ho dezenvolvimentu sosiál, redusaun kiak, igualdade oportunidade no konstrusaun futuru di’ak ba jerasaun foun.

Tanba ne’e, nia husu atu hametin koordenasaun entre setór edukasaun no setór sosiál hodi asegura katak estudante hotu, liuliu sira ne’ebé mai husi família vulnerável, hetan apoiu ne’ebé presiza atu kontinua sira-nia estudu.

Nia mós enfatiza katak la bele husik labarik ida hela iha prosesu edukasaun ,tanba difikuldade ekonómika ka situasaun família.

Tuir Filomeno, estudante feto no mane sira-nia partisipasaun iha edukasaun sai indikadór importante ba dezenvolvimentu rekursu umanu i,ha postu administrativu hitu iha Munisípiu Kovalima.

Iha parte ikus, nia mós hato’o apresiasaun ba instituisaun hotu ne’ebé servisu maka’as atu prepara no organiza Ezame Nasionál ba Ensinu Báziku, Ensinu Sekundáriu Jerál no TECVOC iha munisípiu ne’e.

Nia apela ba parte hotu atu kontinua servisu hamutuk no tau edukasaun hanesan prioridade, hodi harii jerasaun foun ne’ebé iha koñesimentu, kapasidade, karakter no responsabilidade ba futuru Timor-Leste, liuliu Munisípiu Kovalima.

Bazeia ba dadus ne’ebé mak TATOLI asesu alunu finalista rihun 2 resin mak tuir ezame nasional iha Kovalima.

Notisia relevante:Ministra Edukasaun husu estudante finalista sira uza máskara iha ámbitu ezame nasionál

Jornalista:Celestina Teles 

Editór:Florencio Miranda Ximenes