Bidau-Akadiruhun: Uma-kain 43 hahú sobu fatin negósiu ba alargamentu estrada
DÍLI, 19 Outubru 2026 (TATOLI) – Uma-kain 43 iha Suku Bidau-Akadiruhun, Munisípiu Díli, hahú sobu rasik sira-nia fatin negósiu atu fó espasu ba projetu alargamentu estrada, husi Bidau Toko Baru to’o Igreja Katedrál Díli.
Inisiativa ne’e mai rasik husi komunidade sira, molok ekipa Sekretaria Estadu Asuntu Toponímia (SEATOU) no Ministériu Obras Públikas (MOP) hahú prosesu demolisaun.
Porta-voz ba uma-kain 43, Dariati Asunção, hateten katak komunidade sira deside sobu rasik fatin negósiu atu bele aproveita fali materiál konstrusaun, hanesan kalen no besi, ba nesesidade seluk.
“Fatin negósiu sira-ne’e ami mak sobu rasik atu bele uza fila-fali kalen no besi sira. Se eskavadora husi MOP mai sobu, ami sei labele aproveita materiál sira-ne’e,” Dariati hateten ba TATOLI iha nia fatin negósiu, iha Bidau-Akadiruhun, Díli, Segunda ne’e.
Nia esplika katak, iha fulan-Jullu liubá, sira simu ona notifikasaun husi SEATOU atu hasai sira-nia fatin negósiu iha estrada ninin entre Agostu no inísiu Novembru. Tanba ne’e, sira deside kumpre notifikasaun ne’e hodi hahú sobu fatin negósiu rasik molok ekipa governu mai hala’o demolisaun.
Dariati mós konfirma katak demolisaun ne’e la inklui fatin negósiu tomak, maibé limita de’it ba parte ida ho naruk metru lima, ne’ebé sei fó ba Estadu atu fasilita alargamentu estrada.
“Ami hotu aseita tanba ne’e ami oferese ami-nia rai no fatin negósiu, maski sobu metru lima. Maibé, ba dezenvolvimentu nasionál, ita povu tenke kumpre,” nia dehan.
Maski simu projetu ne’e, Dariati hateten katak sira sei hein hela indemnizasaun husi Governu.
Tuir nia, ekipa halo ona verifikasaun ba fatin sira-ne’e, maibé to’o agora osan seidauk tama ba sira-nia konta bankária.
Entretantu, Xefe Suku Bidau-Akadiruhun, Juvinal da Conceição, hateten katak uma-kain 43, husi Bidau Toko Baru to’o Ofisina Sister Motor, mak afetadu hosi projetu alargamentu estrada ne’e.
“Sira komesa sobu rasik sira-nia hela-fatin ka fatin negósiu hodi fó espasu ba MOP atu hala’o servisu,” Juvinal dehan.
Juvinal informa mós katak ekipa konjunta husi SEATOU no MOP planeia atu hala’o prosesu despeju administrativu ba uma-kain 43 ne’e, maibé to’o agora prosesu ne’e seidauk realiza.
Tuir nia, SEATOU no MOP sei kontinua sira-nia servisu, no autoridade lokál iha suku informa ona katak ekipa sira sei fila mai iha fulan Outubru atu hala’o despeju administrativu. Maibé, data exata sei fó hatene ba komunidade afetada sira liuhosi informasaun ofisiál husi Governu.
Xefe suku ne’e mós afirma katak komunidade afetada sira kompleta ona dokumentu nesesáriu, inklui kartaun eleitorál no informasaun konta bankária, no asina ona termu aseitasaun.
Nia husu ba komunidade sira atu iha pasiénsia no hein prosesu indemnizasaun tuir prosedimentu ne’ebé Governu estabelese.
Jornalista: Camilio de Sousa
Editór: Filomeno Martins
