FFTL seidauk iha kondisaun fó apoiu finanseiru ba Liga Futeból Timor-Leste
DILI, 19 Outubru 2026 (TATOLI)–Federasaun Futeból Timor-Leste (FFTL) liuhusi Prezidente Nilton Telmo Gusmão dos Santos deklara katak iha tinan 2026 ne’e seidauk iha kondisaun atu fó apoiu finanseiru ba Liga Futeból Timor-Leste (LFTL).
“Tinan ne’e ita seidauk iha kondisaun atu apoiu finanseira ba Liga Futeból Timor-Leste, liga hanoin sei bele la’o hela ho apoiu husi Ministériu Juventude Desportu Arte no Kultura (MJDAK). Sira la’o lai hanesan ne’e, ami fó apoiu morál, ami fó apoiu arbitru atu lidera jogu, maibé apoiu finanseira FFTL seidauk iha kondisaun,” Prezidente FFTL, Nilton Telmo Gusmão dos Santos, hateten ba TATOLI iha Otél Timor, foin lalais ne’e.
Nia esplika, FFTL labele aloka orsamentu ba Liga Futeból Timor-Leste tanba federasaun sei iha obrigasaun barak ne’ebé presiza rezolve, relasiona ho dívida ne’ebé estrutura pasadu husik hela.
“Ita labele fó orsamentu tanba sei iha buat barak ne’ebé presiza rezolve, tanba iha estrutura pasadu husi hela dívida lubuk ida, até ohin loron de’it mós ita seidauk rezolve hotu,” nia dehan.
Nia dehan, dívida ne’ebé presiza rezolve hamutuk kuaze $200.000, maibé FFTL rezolve ona $600.000 resin, entaun fundu ne’ebé simu labele aloka hotu ba dezenvolvimentu futeból.
“Divida ne’ebé ita presiza rezolve kuaze $200.000 mak presiza rezolve, maibé ita rezolve ona $600.000 resin, entaun ita-nia fundu ne’ebé ita simu la konsege aloka hotu ba dezenvolvimentu futeból tanba problema pasadu sira-ne’ebé ita iha,” nia dehan.
Maske nune’e, Nilton otimista katak iha tinan 2027 ne’e, FFTL sei iha kondisaun finanseira ne’ebé solidu liu no iha ona kbiit atu apoia atividade liga nian.
“Ha’u fiar, iha tinan 2027, ita iha posibilidade diferensa. Tanba kondisaun finanseira FFTL nian sei solidu liutan. Signifika, ita iha ona kbiit atu realiza atividade sira, maibé iha tinan ida-ne’e ha’u sei la promete buat ida no tinan oin ita iha ona dalan atu apoiu sira,” nia hateten.
Jornalista : Hortêncio Sanchez
Editór : Cancio Ximenes
