KAK propoin adisionál rihun $60 atu rekruta espesialista anti-korrupsaun na’in-sanulu
DILI, 19 Outubru 2026 (TATOLI)-Komisaun Anti-Korrupsaun (KAK) nia proposta Orsamentu Jerál Estadu (OJE) 2027 hetan alokasaun millaun $2,2, maibé la kobre atividade sira.
Tanba ne’e, liuhusi audiénsia públika ho Komisaun A ba Asuntu Konstitusionál no Justisa KAK aprezenta pedidu adisionál rihun $60 atu halo rekrutamentu ba espesialisita anti-korrupsaun na’in-sanulu no finansia atividade sira seluk.
Komisáriu KAK, Rui Pereira dos Santos, dehan Komisaun nia proposta tinan oin hetan redusaun rihun $30, kompara ho orsamentu fiskál tinan ne’e.
“Ida ne’e prejúdika atividade, [entaun ami] propoin adisional rihun $60 atu sosa ekipamentu eletróniku apoiu serbisu investigadór sira, halo rekrutamentu ba espesialista anti-korrupsaun na’in-sanulu apoiu serbisu deklarasaun rikusoin, tanba durante ne’e funsionáriu ne’ebé destaka mai husi inspesaun no monitorizasaun”, nia hatete.
Komisáriu ne’e dehan ho proposta adisionál ne’e, depende ba desizaun husi deputadu sira atu konsidera.
KAK iha tinan oin kontinua Programa Investigasaun Kriminál ba kazu korrupsaun sira no programa prevensaun no sensibilizasaun, halo peskiza ne’ebé daudaun la’o hela iha liña ministériu ba presepsaun funsionáriu públiku kona-ba prevensaun korrupsaun, formasaun ba inspetór sira iha munisípiu hotu no seluk tan.
Durante audiénsia, KAK aprezenta ezekusaun OJE 2026 atinje ona 60% husi montante inisiál millaun $2,3.
Dezde Janeiru, Servisu Investigasaun Kriminál finaliza ona averiguasaun kazu 30-resin, autopartisipasaun 20-resin ba Ministériu Públiku, aleinde ba prevensaun kontinua halo inspesaun ba projetu sira ne’ebé daudaun implementa iha territóriu.
Prezidente Komisaun A, Natalino dos Santos, hatete pedidu adisionál ne’e komisaun sei diskute no haree nesesidade no depende ba desizaun, tanba Parlamentu hanesan órgaun kolejiál.
Komisaun sujere atu halo rekrutamentu ba funsionáriu, liuliu tékniku espesializadu ba reforsa instituisaun no se presiza funsionáriu administrativu nian bele halo de’it rekolokasaun husi Komisaun Funsaun Públika.
Jornalista: Nelson de Sousa
Editora: Maria Auxiliadora
