Konstrusaun Estádiu Dili sei finaliza iha tinan 2027 nia rohan
DILI, 19 Outubru 2026 (TATOLI)–Prezidente Federasaun Futeból Timor-Leste (FFTL), Nilton Telmo Gusmão dos Santos, garante katak konstrusaun Estádiu Dili sei finaliza iha tinan 2027 nia rohan.
Konstrusaun Estádiu iha Munisípál Dili sei hahú ofisialmente iha fulan-Novembru tinan ne’e, hafoin FIFA foti ona desizaun finál no aloka orsamentu ba projetu ne’e.
“Konstrusaun estádiu Munisípiu Dili ne’e sei hahú iha fulan-Novembru tinan ne’e, tanba aprovasaun ba ezekusaun projetu ne’e hala’o ona. FIFA foti ona desizaun no aloka ona orsamentu,” Nilton hateten ba TATOLI iha Otel Timor foin lalais.
Nia hatutan, ho objetivu katak to’o finál tinan 2027, Timor-Leste bele ona iha infraestrutura ne’ebé adekuadu, nune’e iha tinan 2028 bele organiza jogu internasionál iha rai laran.
“Iha tinan 2028, ita bele organiza jogu internasionál iha ita-nia rain rasik,” nia dehan.
Tuir planu, Estádiu ne’e la’ós de’it atu uza ba futeból maibé bele uza mós ba atividade sosiál no desportiva seluk hanesan atletizmu. Pista atletizmu ne’ebé iha agora sei hetan reabilitasaun atu fó kondisaun di’ak liután.
“Purtantu, ita espera katak iha tinan 2028 mak ita bele hahú uza estádiu ne’e. Maibé klaru katak kompañia ne’ebé responsavel ba konstrusaun tenke hala’o servisu tuir prazu ne’ebé konkorda ona, atu antes finál tinan 2027 infraestrutura ne’e bele prontu,” nia hatutan.
Kona-ba festival ne’ebé sei hala’o iha futuru, Nilton hateten durante períodu konstrusaun sei la bele uza estádiu ne’e, maibé iha alternativa seluk.
“Pur ezemplu, kampu Federasaun Futebol Timor-Leste nian, depende ba nia kondisaun, bele sai alternativa ida atu hala’o festival ne’e. Maibé ida-ne’e depende ba Ministériu Juventude, Arte no Kultura,” nia dehan.
Kona-ba kompañia estranjeira ne’ebé sei hala’o konstrusaun, informasaun ne’e sei publika posteriormente.
“Ha’u seidauk hakarak fó informasaun kona-ba kompañia ne’e agora. Maibé ami fiar katak kompañia ne’ebé hili ona iha kapasidade no kondisaun atu hala’o projetu ne’e. FIFA mós envolve diretamente iha prosesu ne’e,” nia hateten.
Enkuantu orsamentu ne’ebé FIFA aloka ba reabilitasaun Estádiu Dili ho montante miliaun $4.8 ho durasaun ba konstrusaun durante tinan ida.
Jornalista : Hortêncio Sanchez
Editór : Cancio Ximenes
